Qazaqstannyń Tájikstandaǵy Elshisi Nurlan Seıtimov Tájikstan Respýblıkasynyń bas prokýrory Rahmon Iýsýf Ahmadzodqa «Qazaqstan Respýblıkasynyń prokýratýrasyna 25 jyl» mereıtoılyq medalin tabystady, dep habarlaıdy QazAqparat.
Nurlan Seıtimov Tájikstan bas prokýrorymen kezdesý barysynda Qazaqstan damýynyń qazirgi kezdegi negizgi baǵyttary jaıynda keńinen sóz qozǵady. Sonymen qatar, ol Qazaqstandaǵy bılik tarmaqtary arasyndaǵy ókilettikterdi qaıta bólý máseleleri jónindegi QR Prezıdenti Nursultan Nazarbaevtyń halyqqa úndeýi men «Qazaqstannyń úshinshi jańǵyrýy: jahandyq básekege qabilettilik» atty Joldaýynyń negizgi baǵyttaryn tanystyrdy.
Taraptar sondaı-aq, eki eldiń quqyq qorǵaý organdary arasyndaǵy ózara qarym-qatynastyń keleshegin, onyń ishinde quqyqtyq yntymaqtastyqtyń keıbir máselelerin talqylady.
О́z kezeginde Rahmon Iýsýf Ahmadzod marapat úshin alǵysyn bildirip, qazaqstandyq áriptesterimen jemisti yntymaqtastyqqa daıyn ekendigin bildirdi.