Qazirgi tańda qolǵa alynyp jatqan ózgerister – bul mańyzdy, tarıhı jaǵdaı. Sebebi, Prezıdent óziniń ókilettigin Úkimet pen Parlamentke berýge nıet tanytyp otyr. Sol arqyly jaýapkershilik júktelmek. Onyń ishinde Parlament Májilisiniń ókilettigin arttyrý arqyly da úlken jaýapkershilik júktelip otyr. Sebebi, zań normalarynyń ıgiligin eń aldymen, halyq kórýi tıis. Ol úshin halyqtyń ózi saılaǵan Parlament depýtattary óz jumystaryn belsendi ári aıryqsha yjdaǵattylyqpen atqara bilýi qajet.
Buǵan qosa, Parlament Úkimettiń jumysyna baqylaý júrgizetin bolady. Máselen, Úkimetti jasaqtaý, mınıstrlerdi taǵaıyndaý, Úkimet qabyldaǵan memlekettik baǵdarlamalardyń der kezinde ári nátıjeli oryndalýyn qadaǵalaý sekildi máseleler memleket úshin, halyq úshin aıryqsha mańyzdy. Jalpy, bul konstıtýsııalyq reforma elimizdegi bılik tarmaqtarynyń tetigin kúsheıtý arqyly memleketimizdiń saıası júıesin demokratııalandyrýǵa, ony alǵa qaraı ilgeriletýge sep bolary anyq.
Baqtııar MÁKEN,
Parlament Májilisiniń depýtaty