Búgingi otyrysta menshik quqyǵy máselesi óte jaqsy kóterildi. Ásirese, ózge elderden ınvestorlardy tartý maqsatynda jasalǵan mańyzdy qadam bolatyn. Sheteldikter kóbine menshiktik quqyqqa aıryqsha mán beredi. Bálkim, bul der kezinde jasalmaǵan shyǵar, biraq memleketimizdiń ózindik baǵytyn aıqyndaǵany erekshe unady. Degenmen, bul jerde halyq basqa qyrynan alyp talqylady.
Sonymen qatar, bir aıta keterligi, Prezıdenttiń memleket basqarý isindegi biliktiligi jáne ózine berilgen bılikti óte tıimdi jáne halyqtyń ıgiligine paıdalana alýy, sol arqyly bıliktiń bedelin kóterýi Úkimet pen Parlamentke úlgi bolyp, bıliktiń ózge tarmaqtary da Prezıdenttiń qyzmet etkenindeı qyzmet ete alsa, bizdiń bolashaǵymyzdyń jarqyn bolary sózsiz.
Onyń ústine, qazir álemniń keı elderinde Memleket basshysynyń ókilettikteri kerisinshe artyp jatyr. Al biz bir qalypqa túsip, júıeli damýdy betke ustaǵandyqtan, qazirgi kezde Prezıdenttiń óziniń osy usynysymen bıliktiń basqa ınstıtýttarynyń, atap aıtar bolsaq, atqarýshy jáne zań shyǵarýshy bıliktiń róli men jaýapkershiligi kúsheıtilýde. Bul eldegi qabyldanatyn zańdardyń sapasy men olardyń atqarylýynda halyqqa qyzmet etýdiń jańa bir belesi bolmaq. Bul – bizdiń Konstıtýsııamyzda kórsetilgen quqyqtyq memleket ekendiginiń bir aıǵaǵy.
Svetlana BYChKOVA,
Parlament Májilisiniń depýtaty