Keshe Premer-Mınıstrdiń orynbasary – Aýyl sharýashylyǵy mınıstri Asqar Myrzahmetovtiń tóraǵalyǵymen vedomstvonyń keńeıtilgen alqa otyrysy ótti. Onda Memleket basshysy Nursultan Nazarbaevtyń halyqqa arnaǵan kezekti Joldaýynda júktegen tapsyrmalaryn júzege asyrý joldary men Agroónerkásiptik keshendi damytýdyń 2017-2021 jyldarǵa arnalǵan baǵdarlamasy talqylandy. О́ıtkeni, bas qujatta salany el ekonomıkasynyń jańa draıverine aınaldyrý jóninde naqty mindetter qoıylǵan.
Jıynda birinshi vıse-mınıstr Qaırat Aıtýǵanov baıandama jasap, ótken jylǵy kórsetkishterge toqtaldy. Byltyr Qazaqstanda 3,6 trln teńgeniń aýylsharýashylyq ónimi shyǵarylǵan. Bul salanyń 5,5 paıyzǵa ilgerilegenin ańǵartady. «2016 jyly 1,3 trln teńgeniń azyq-túlik ónimderi óndirildi. Osylaısha saladaǵy kórsetkish 4 paıyzǵa ósken. Ásirese, Jambyl oblysy 40 paıyzdan astam, Qostanaı oblysy 21 paıyzdan astam, Aqmola oblysy 10 paıyzǵa jýyq, Qyzylorda oblysy 7 paıyzdan astam azyq-túlik ónimin ortaq óndirgen. Alaıda, keıbir óńirlerde kórsetkish tómendegen. Mysaly, Mańǵystaý oblysy – 13,5 paıyz, Batys Qazaqstan oblysy – 4,3 paıyz, Atyraý oblysy – 3,1 paıyz, Shyǵys Qazaqstan oblysy – 1,1 paıyz», dedi ol.
Basqosý barysynda Qazaqstanda organıkalyq azyq-túlik standarttary boıynsha normatıvtik qujat qabyldanatyny málim boldy. «2021 jylǵa qaraı azyq-túlik ónimderi eksportyn 40 paıyzǵa ulǵaıtý mindetin sheshý úshin árbir jylǵa arnalǵan naqty kórsetkishter aıqyndalǵan. Aǵymdaǵy jyly eksport kólemi 10 paıyzǵa artady dep kútilýde. Osyǵan baılanysty áleýmettik eksporttyq naryqtar boıynsha jol kartasyn bekitý jáne maqsatty ádisterdi túzý qarastyrylýda», dedi Q.Aıtýǵanov baıandamasynda. Onyń aıtýynsha, áleýetti eksporttyq naryqtar retinde Qytaı, Reseı jáne Parsy shyǵanaǵy elderi qarastyrylýda. Ol úshin azyq-túlik korporasııasynyń qyzmeti qaıta uıymdastyrylǵan. Budan bólek, «QazEksportGarant» arqyly aýylsharýashylyq taýarlaryn óndirýshilerge eksporttyq kelisimsharttarmen saqtandyrý men kepil usynylmaq. Sonymen qatar, organıkalyq azyq-túlik standarttary, bıopreparattardy óndirý jáne qoldaný boıynsha normatıvtik qujat qabyldanyp, qajetti zerthanalar qurylady.
Aýyl sharýashylyǵy mınıstriniń birinshi orynbasary ótken jyly Elbasy tapsyrmasyna sáıkes shaǵyn jáne orta sharýashylyqtardy kooperatıvke tartý jumystary qolǵa alynǵanyn jetkizdi. «15 myń jeke qosalqy sharýashylyqty qamtyǵan 157 kooperatıv quryldy. Olardyń bazasynda júzden astam sút qabyldaıtyn pýnkt pen 7 myń otbasylyq bordaqylaý alańy uıymdastyryldy. Tolyqtaı alǵanda, ındıkatıvti josparlar barlyq oblystar boıynsha oryndaldy», dedi ol. Vıse-mınıstrdiń sózine qaraǵanda, aǵymdaǵy jyly jergilikti atqarýshy organdar 410 kooperatıv quratyn bolady. «Tolyqtaı alǵanda aldaǵy 5 jylda kooperatıvter qyzmetimen jarty mıllıon jeke qosalqy sharýashylyq pen shaǵyn sharýashylyq qamtylady. Kooperatıvter ónimderdi daıyndaýǵa, saqtaýǵa jáne tasymaldaýǵa kómektesedi. Buǵan qosa, veterınarııa, mal azyǵyn daıyndaý, agrohımııa jáne óz múshelerine nesıe berýde járdemdesedi. Jalpy, kooperatıvter aýyldardyń odan ári damýynyń negizi bolýy tıis», dedi Q.Aıtýǵanov.
Ashat RAIQUL,
«Egemen Qazaqstan»