Elbasy Qorynyń syılyǵyn kimder aldy?

Bıyl Elbasy Qorynyń syı­lyǵy to­ǵy­zynshy ret tapsyrylyp otyr. 2008 jyly ta­ǵaıyn­dalǵan syılyqqa osy ýaqytqa deıin 160-tan astam daryndy jas ıe bolǵan. Mádenıet pen óner, bilim men ǵylym salalarynda jemisti eńbek etip, ózderin mádenı, ǵylymı ortalarda tanyta alǵan jastardyń jetistikterin moıyndaý, sondaı-aq, olarǵa qoldaý kórsetý maqsatynda taǵaıyndalǵan bul syılyqqa bıyl da elimizdiń túkpir-túkpirinen úmitkerler kóp bolǵan. Qor syılyǵyn taǵaıyn­daıtyn komıssııa 127 ótinimniń ishinen 18-in úzdik dep taýypty. Shara barysynda syılyq ıelerine quttyqtaý sóz arnaǵan Qazaqstan Respýblıkasynyń Tuńǵysh Prezıdenti – Elbasy qorynyń atqarýshy dırektory Qanat Jumabaev: «Prezıdent Qorynyń mindeti – jastardyń jańa býynyn qalyptastyrý. Bizdiń laýreattarymyz búgingi kúni kásibı maman retinde tanymal bolyp otyrǵany qýantady», dep atap ótti. Qordyń bıylǵy syılyǵy buıyrǵan úmitkerler arasynda «Astana Opera» memle­kettik opera jáne balet teatrynyń jetekshi solısi Talǵat Musabaev, Q.Qýanyshbaev atyndaǵy Memle­kettik akademııalyq qazaq mýzy­kalyq-drama teatrynyń akteri Syrym Qashqabaev, «Astana Opera» memlekettik balet jáne opera teatry balet trýppasynyń jetekshi solısi Mádına Basbaeva, búgingi kúni Qytaıda ótip jatqan «I am a singer» baıqaýyna qatysyp, júldeli bıikten kórinip jatqan jas ánshi Dımash Qudaıbergenov syndy ónerli jas­tar bar. Bir aıta keterligi, Elbasy Qorynyń syı­lyǵy óner men ǵylym salasyna teń bó­lingen. Iаǵnı, ónerli jastar men ǵylym-bilim­degi jastardyń ara salmaǵy teń eseptelgen. Aıgúl SEIILOVA, «Egemen Qazaqstan» Sýretti túsirgen Orynbaı BALMURAT, «Egemen Qazaqstan»