Sońǵy 9 táýlik ishinde Mosýl qalasynyń batys bóligin 45 myń turǵyn tastap ketti. Bul aımaqtan kóship jatqandar qatary kún sanyp kóbeıip keledi. Mundaı málimetti Halyqaralyq kóshi-qon uıymy taratty, dep habarlady 24.kz.
Buǵan deıin AQSh basqaratyn koalısııa kómegimen Irak áskeri shahardyń ortalyq bóligin azat etýge kirisken bolatyn.
Aıta ketý kerek, Mosýl qalasyn «Irak pen Levant lańkestik uıymynyń» sodyrlary 2014 jyly basyp alǵan. Sodan beri jurt bılik áskerine qaraı qashyp jatyr. Al úkimet jasaǵy qalany azat etý úshin ótken jyldyń qazanynda kirisken.
Qazir Mosýl shyǵysy qaskóılerden tolyqtaı ada bolyp, qalypty ómirge kóshe bastady. Degenmen, batysynda áli de lańkester bılik quryp tur.