Astanada gaz salasyndaǵy ulttyq operatordyń óndiristik kompanııasy "QazTransGazAımaq" AQ-qa Eýropalyq sapa menedjmenti qorynyń 5-deńgeıli "Moıyndalǵan kemeldilik" sertıfıkatyn tabystaýǵa arnalǵan resmı shara ótti.
Otandyq óndiristik kompanııa osyndaı joǵary deńgeıli sertıfıkatqa tuńǵysh ret qol jetkizdi. Bul – tek «QazTransGazAımaq» AQ úshin emes, sonymen qatar kásibiniń sapasyn kóterýge nıetti qazaqstandyq ózge de kompanııalar úshin aıtýly oqıǵa.
Eýropalyq sapany basqarý qory moıyndaǵan kári qurlyqtaǵy mundaı kompanııalar úzdikterdiń úzdigi sanalady. Degenmen, olar osy jetistigimen toqtap qalmaıdy. Sertıfıkatty ıelengen mekeme naryqta qalyptasqan jaǵdaıǵa baılanysty basqarý prosesterin odan ári jetildire berýge múddeli bolady.
«QazTransGazAımaq» AQ qyzmetin EFQM-de tirkelgen bedeldi sarapshylar arnaýly 9 túrli ólshem boıynsha baǵalady. Bular – kóshbasshylyq, bilikti qyzmetkerler, áriptestik pen resýrstar, óndiristik úderister, ónimder men qyzmet túrleri, tutynýshylarǵa arnalǵan nátıje, qyzmetkerlerge arnalǵan nátıje, qoǵamǵa arnalǵan nátıje, bıznestiń sheshýshi nátıjeleri. Aıta ketý kerek, gaz salasyndaǵy ulttyq operator úshin bıznes-prosesterdi jetildirý – kompanııalar tobynda árdaıym basymdyq berilgen eń mańyzdy máselelerdiń negizgisi bolyp tabylady. Buǵan «QazTransGaz» AQ-tyń «Samruq-Qazyna» ál-aýqat qory» AQ júrgizip otyrǵan transformasııalaý jáne ońtaılandyrý baǵdarlamasy boıynsha úzdik sanalýy dálel bola alady.
«QazTransGazAımaq» AQ bas dırektory Manas Tasybaev sertıfıkattyń tabystalýy ulttyq operatordyń qyzmetiniń jetistigin moıyndaý dep sanaıdy. «Osyndaı sertıfıkattar men joǵary baǵaǵa bizder birigip qol jetkizdik, – dedi Manas Tasybaev. – Degenmen, bizdiń jumysymyzǵa berilgen bul baǵa bizge jaýapkershiligi joǵary mindetter de júkteıdi. Sondyqtan da ári qaraı da tynbaı qyzmet etip, abyroıymyzdy arttyryp, ınvestısııalyq tartymdylyq pen nesıelik senimdilikti joǵaltpaýymyz qajet».
«QazTransGazAımaq» AQ qyzmeti 2013 jyldan beri baǵalanyp keledi. Sodan beri kompanııa menedjmenttiń halyqaralyq standarttaryn engizip, sapany, ekologııalyq aspektiler men óndiristik qaýipsizdikti basqarýdyń tıimdi ıntegrasııalanǵan júıesin qura bildi. Kompanııa ıelengen Fransııanyń AFNOR agenttiginiń ISO halyqaralyq standarttary osynyń aıǵaǵy bolyp tabylady.
Otandyq kompanııalardyń eýropalyq sapa standarttaryna saı bolýyn Prezıdent Nursultan Nazarbaev atap ótken bolatyn. Elbasy qazaqstandyq kásiporyndardyń basshylaryn ónimge degen suranystyń joǵary bolýyn qatamasyz etip, zaman talabyna sáıkestendirý úshin óndiriste ınnovasııalyq jetistikterdi engizýge shaqyrdy.
EFQM atynan salmaqty marapatty tabys etken «Qazaqstandyq sapa uıymy jáne ınnovasııalyq menedjment» qoǵamdyq uıymynyń prezıdenti Azat Abdrahmanov mundaı baǵa Qazaqstannyń óndiristik kompanııalary úshin aıtýly oqıǵa bolyp tabylatyndyǵyn atap ótti. «Bul – qol jetkizilgen nátıjelerge berilgen joǵary baǵa. «QazTransGazAımaq» AQ «BMW», «BOSCH», «Grundfos» sııaqty álemge áıgili kompanııalar engen, moıyndalǵan eýropalyq kompanııalardyń qataryna qosyldy. Kompanııanyń bulaısha tanylýy sheteldik ınvestorlardyń qyzyǵýshylyǵyn áldeqaıda arttyrady», dedi Azat Abdrahmanov.
«Moıyndalǵan kemeldilik» EFQM sertıfıkaty – Eýropanyń bıznes salasyndaǵy eń bedeldi júldelerdiń biri sanalady. Eýropa elderiniń sapany baqylaý salasyndaǵy ulttyq jáne aımaqtyq deńgeıdegi ózge marapattary soǵan qarap boı túzeıdi.
Aınash ESALI,
«Egemen Qazaqstan»