Ejelden «Bir qozy artyq týsa, bir túp jýsannyń da artyq shyǵatynyn» uǵynǵan halqymyz ana men balaǵa aıryqsha kóńil bólgen. Bul kúnde demografııalyq ósýdi basty nazarǵa alǵan elimiz úshin óńirlerdegi kórsetkish te edáýir jaqsarǵan. Jýyrda ǵana Taraz qalasynda №1 qalalyq aýrýhana janynan 25 oryndyq bosaný bólimshesi ashylǵan bolatyn. Ashylǵanyna apta tolmaǵan perzenthana sol kúnnen bastap-aq júkti áıelderdi qabyldap, onda kúni búginge deıin 8 sábı dúnıe esigin ashty.
Bul – óńirimizdegi kóp salaly aýrýhana janynan qurylǵan alǵashqy perzenthana. Oblys ákimdigi densaýlyq saqtaý basqarmasynyń ana men bala densaýlyǵyn qorǵaý bóliminiń basshysy Quralaı Sarına atalǵan perzenthana Densaýlyq saqtaý mınıstrliginiń aımaqtandyrý baǵdarlamasyna oraı ashylyp otyrǵanyn aıtady. Sonymen qatar, bul bosaný bólimshesi birinshi deńgeıli bolyp esepteledi. Mamandardyń aıtýynsha, munda densaýlyǵy qalypty, júktilik kezeńinde eshqandaı oqys jaǵdaılar, asqynýlar bolmaǵan áıelder qabyldanady jáne jyl saıyn orta eseppen 2500-3000 sábı osy shańyraqta dúnıege keledi. Sondaı-aq, perzenthananyń árbir bólmesine ana qursaǵyndaǵy sharananyń júrek qaǵysyn qadaǵalaıtyn qondyrǵy ornatylǵan. Qajetti jabdyqtar Germanııa, Izraıl jáne Reseıden jetkizilgen. Mekemede analar men balalar úshin bar jaǵdaı jasalǵan. Al, perzenthana mamandary ana men bala qaýipsizdigi jáne jańa perınataldyq tehnologııalar boıynsha arnaıy kýrstardan ótken. Perzenthananyń bosaný bóliminiń meńgerýshisi, joǵary sanatty dáriger Olga Bolshakova qajet jaǵdaıda jańa bosanǵan analarǵa psıholog ta kómekke keletinin, bosanǵannan keıin sábıdiń birden anasyna beriletinin jáne bul úrdistiń bala aǵzasynda qorǵanys qabiletiniń qalyptasýy úshin mańyzdy ekenin aıtyp otyr.
Hamıt ESAMAN,
«Egemen Qazaqstan»
Jambyl oblysy