Alǵys aıtý kúnimen bastalǵan naýryz Batys Qazaqstan oblysynda «Meıirimdi kóktem» sharasyna jalǵasty. Arnaıy qurylǵan qaıyrymdylyq qyzmetin úılestirý keńesi tuńǵysh ret bas qosyp, keńeıtilgen otyrys ótkizdi. Oǵan óńir basshysy Altaı Kólginov jáne qaıyrymdylyq istermen aınalysyp júrgen kásipkerler, etnomádenı ortalyq jetekshileri qatysty.
– «Alǵys kúni» merekesiniń Assambleıanyń qurylǵan kúnimen tuspa-tus kelýi tegin emes. Júk vagondaryna tıelip, bir túnniń ishinde qazaq dalasyna attandyrylǵan kóptegen halyqtyń tragedııasy umytylmaıdy. Biraq ol halyqtar qazaq halqynyń keńpeıildiligi arqasynda jańa mekenge tez jersinip ketti. Urpaq órbitip, salt-dástúrin jańǵyrtyp, kóp ultty Qazaqstannyń damyp-gúldenýine óz úlesin qosty. Búginnen bastap oblysymyzda «Meıirimdi kóktem» jobasy bastaý alyp jatyr. Bul isten óńir kásipkerleri qalys qalmaıdy dep senemin. Memleket kásipkerliktiń damýyna barynsha jaǵdaı jasaýda. Bıznes ókilderi de ózderiniń áleýmettik jaýapkershiligin jete sezinip, bul baǵyttaǵy jumystarǵa qoldaý bildirerine senimim mol», dedi Altaı Seıdiruly.
Qaıyrymdylyq qyzmetin úılestirý keńesiniń negizgi mindeti – memleket barynsha qoldap otyrǵan bıznes ókilderi men kómekke muqtaj ortalardy baılanystyrý, qaıyrymdylyq sharalaryna muryndyq bolý. Birinshi kezekte múmkindigi shekteýli azamattardyń em-sharalary men arnaıy arbalar satyp alyp berý josparlanyp otyr. Máselen, Gúlmıra Batpaqulova jetekshilik etetin «Arba» qoǵamdyq uıymynyń on adamdy arnaıy oryndarda emdelýge jiberý ótinishi aldymen qaralatyn boldy.
«Meıirimdi kóktem» sharasy úsh aıǵa sozylmaq.
Qazbek QUTTYMURATULY,
«Egemen Qazaqstan»
ORAL