Aqtóbe aımaǵynda «Biz – birgemiz!» atty áleýmettik-qaıyrymdylyq turǵysynan máni men mańyzy joǵary aksııa ótkizý isi dástúrge aınalǵan. Onyń basty maqsaty óz ataýynan kórinip turǵanyndaı – qoǵam múshelerin jumǵan judyryqtaı bir arnaǵa toptastyrýǵa, múmkindigi shekteýli jandardyń qarym-qabiletin kóterýge, azamattyq bastamalardy qoldaýǵa, jáne otanshyldyq sezimdi tereńdetýge baǵyttalǵan. Keshe osy baǵyttaǵy kezekti kezdesý oblys ortalyǵyndaǵy «Atameken» mádenı-ortalyǵynda ótkizildi.
О́mir kúnde toı emes, onyń aldyn ala boljaýǵa múldem kelmeıtin ár túrli synaqtary men tosyn jaǵdaılary da jeterlik. Ashysy men tushysy almasyp keletin ómirde asý da, tasý da, kúıinish te, súıinish te bolmaı turmaıdy. Oılamaǵan jerden taǵdyrdyń aýyr tepkisine tap keletinder de bar. Olarǵa únemi qoldaý men qamqorlyq kórsetý – bizdiń aınymas paryzymyz. Áleýmettik boryshymyz. Dástúrli aksııada Aqtóbe oblysynyń ákimi Berdibek Saparbaev óz sózin osy arnadan sabaqtady.
Tutastaı alǵanda ómirde múgedek jandarǵa kórsetilip júrgen qurmet deńgeıi joǵary. Munda olardy kóleńkesimen qorǵaı júretin márt azamattar legi de mol. Árisin aıtpaǵanda ótken jyly oblystyq ákimdik tarapynan 32 múgedekter otbasyna jan-jaqty jabdyqtalǵan jaıly páterler berilgen. Bıylǵy jyldyń ózinde baspanaǵa muqtaj bes múmkindigi shekteýli jeke tulǵalar ýaqytsha baspanaǵa ornalastyrylǵan. Sondaı-aq, bıylǵy ótkizilgen aksııa kezinde sal aýrýyna ushyraǵan azamattardy qoldaý ortalyǵy qoǵamdyq birlestigine bir mıllıon bes júz myń teńgeniń sertıfıkaty berildi. Ári múgedekterge arnalǵan kólik-taksıler syıǵa tartyldy.
Temir QUSAIYN,
«Egemen Qazaqstan»
AQTО́BE