Almaty qalasy kásipkerlik jáne ındýstrııalyq-ınnovasııalyq damý basqarmasynyń aıtýynsha, ashylǵan saýda oryndarynyń alańy shamamen 20 myń sharshy metrdi quraıdy. Onyń 10 myń sharshy metri saýda alańyna tıesili bolsa, 10 myń sharshy metri 400 kólik qoıýǵa arnalǵan eki beldeýli avtoturaqqa qaramaq. Quny shamamen 2,5 mlrd teńgeni quraǵan joba 500-den astam adamdy jumyspen qamtyǵaly otyr.
Bul saýda ortalyǵyn salý týraly sheshim 2015 jyly qabyldanǵan edi. Jańa ortalyq ornynda buryn ashyq aspan astyndaǵy kókónis-jemis satatyn saýda oryndary ornalasqan bolatyn. «Kók bazar» dırektory Erlan Qalıev jańa salynǵan saýda kesheni sońǵy úlgidegi órtke qarsy tehnıkalarmen jáne jeldetý júıelerimen jabdyqtalǵanyn jetkizdi. «Biz saýda oryndaryn jalǵa alýshylarǵa, osy jerden qajet taýarlardy satyp alýǵa keletin tutynýshylar men týrısterge jaqsy jaǵdaı jasaı aldyq dep oılaımyn. Jańǵyrtý jumystary áli de jalǵasyn tabatyn bolady. Mysaly, eski ǵımaratqa, bazarǵa Jibek joly kóshesi jaǵynan kiretin tusqa jóndeý jumystary júrgizilmek. Degenmen, onyń bári birtindep júzege asyrylatyn sharýalar», – dedi ol.
Aıta ketsek, Almaty qalasyndaǵy barlyq saýda bazarlaryna jańǵyrtý jumystarynyń júrgizilýi Elbasynyń saýdany zamanǵa saı úlgige aýystyrý jónindegi tapsyrmasyn oryndaý maqsatynda júzege asyrylýda.
Mıra BAIBEK,
«Egemen Qazaqstan»
ALMATY