London Olımpıadasynyń chempıony, «Astana Arlans» boks klýbynyń burynǵy basshysy, Qazaqstan Parlamenti Májilisiniń depýtaty Serik Sápıev qazaqstandyq kásipqoı boksshy Fırýza Sháripovanyń reseılik Iýlııa Chernoborodovaǵa qarsy jeńisi jaıly pikir bildrdi. Bul týraly allfight.ru habarlady.
«Fırýzanyń aıqasyn jibermeı kórdim. Joǵary deńgeıde ótkizdi dep senimdi túrde aıta alamyn. Árbir jekpe-jeginde jańa bir deńgeıge kóterilgenin baıqaımyn. Senimdiligi de artqan. Jyldam qozǵalyp úırengenin baıqadym. Shamasy, bul jańa bapkeriniń úıretkeni bolar. Sonymen qatar, Sháripovanyń rıngke shyqqandaǵy mýzykasy (Demıan jáne Nazarbek Orazbekov «Álem chempıonaty») unady. Ol án 2013 jyly álem chempıonatynda da qoıylǵan», – dedi Sápıev.
«Sháripova laıyqty túrde jeńiske jetti dep oılaımyn. Senimdi túrde bokstasyp, qarsylasyn jıi qysymǵa aldy. Biraq onyń birneshe soqqy jiberip alǵan sátteri de boldy. Chernoborodovany osal boksshy dep aıtýǵa kelmes. Qajet kezinde qarsy shabýyldarǵa shyǵyp turdy», – dedi ol
«Fırýzany jeńisimen quttyqtaımyn. Onyń sharshy alańdaǵy mansabynyń alǵa jyljýyna septigin tıgizip júrgen, sondaı-aq Qazaqstan qyzdary arasyndaǵy boksynyń damýyna úlesin qosyp júrgen menedjeri Sergeı Zavıleıskııge alǵysymdy bildirgim keledi. Otandasymyzǵa aldaǵy ýaqytta tek jeńister tileımin! Endi Fırýza elimizde ótetin boks keshteriniń birine qatyssa eken deımin», – dedi Májilis depýtaty.
4 naýryz kúni Máskeý mańyndaǵy «Balashıha» arenasynda Fırýza Sháripova reseılik Iýlııa Chernoborodovany alty raýndtyń qorytyndysy boıynsha tóreshilerdiń biraýyz sheshimimen jeńgen. Sondaı-aq, otandasymyzdyń sharshy alańǵa jaraqat alǵan kúıinde shyqqany belgili boldy.
Aıta keteıik, bıyl Astanada ótetin EKSPO kórmesi kezinde uıymdastyrylatyn boks keshinde ol kezekti ret rıngke shyǵýy múmkin.