Promoýter Tom Leffler meksıkalyq Saýl «Kanelo» Alvares (48-1-1, 34 KO) úshin orta salmaqta WBA (Super), IBO, WBC jáne IBF tujyrymdary boıynsha álem chempıony Gennadıı Golovıkınmen (36-0, 33 KO) jekpe-jegi qarjy jaǵynan tıimdi ekendigin málimdedi.
«Bul boks keshi uıymdastyrylar bolsa, «Kanelo» kishi Floıd Meıýezermen ótken aıqasyna qaraǵanda kóbirek aqsha tabar edi», – dedi Leffler HBO Boxing Podcast efırinde.
Aıta keteıik, meksıkalyq boksshy kishi Floıdpen 2013 jyldyń qyrkúıek aıynda jekpe-jek ótkizip, tóreshilerdiń sheshimimen jeńilip qalǵan. Forbes basylymynyń málimeti boıynsha osy urysy úshin meksıkalyq boksshy bes mıllıon dollar syıaqy alǵan.
Buǵan deıin Golovkınniń promoýteri Leffler «Kanelonyń» ókilderimen jekpe-jek ótkizý jónindegi kelissózderi ortaq ymyraǵa kelgenin málimdegen. Boks keshi osy jyldyń qyrkúıeginde ótýi múmkin. «Aldymen, Gennadıı Djeıkobsty, al Alvares kishi Chavesti mindetti túrde jeńýi qajet», – dedi promoýter.
Saýl Alvares 6 mamyr kúni Las-Vegastaǵy T-Mobile Arena kesheninde otandasy kishi Hýlıo Sezar Chavespen 164,5 fýnt salmaqta judyryqtasady. Osyǵan deıin ol Golovkınmen 160 fýntta sharshy alańǵa shyǵýdan bas tartqan bolatyn. Al qazaqstandyq boksshy 18 naýryzda Nıý-Iorktegi Madison Square Garden arenasynda amerıkalyq Dennıel Djeıkobspen (32-1, 29 KO) qolǵap túıistiredi.