Siz oılaǵandaı emes, Arqaǵa kóktem erte keledi. 8 naýryz – Halyqaralyq áıelder kúnine oraı Qaraǵandynyń iri jylyjaı kesheninde 240 myń 750 qyzǵaldaq ósirildi.
Tipti, Astana men Aqtaýdyń jigitteri sulýlarǵa qaraǵandylyq qyzǵaldaqtardy tartý etken bolar. Gúlderdi Qaraǵandydaǵy «Green Technology» JShS jylyjaı kesheninde ósirgen.
«Jeltoqsan aıynda biz Gollandııadan ákelingen qyzǵaldaqtardyń badanalaryn otyrǵyzdyq. Tikeleı jetkizilimmen keldi. Barlyǵy – 12 suryp, sonyń ekeýi jańa», deıdi «Green Technology» JShS-niń bas agronomy Galına Kızılova.
Jylyjaıdan kez kelgen talǵamǵa saı túster tabylady. Qyzyl, sary, jıegi alqyzyl aq tústi, kókshil, qyzǵylt deısiz be, kózdiń jaýyn alady. Bul kúnde jańaǵy eki júz myńnan astam gúlderdiń barlyǵy satylyp ketken.
Bıyl kásiporynnyń jetkizý baǵyttaryna batys óńiri qosylǵan. Olardyń aıtýynsha, búginde 50 myńnan asa qyzǵaldaq Aqtaýǵa, 20 myńy Astanaǵa jóneltilgen. Pavlodarda da kóterme satyp alýshylar bar.
Negizinen ósirilgen qyzǵaldaqtardyń jartysynan astamy jergilikti naryqta satylatyn kórinedi.
Sonymen qatar, jylyjaı kesheni qııar ósirýge mamandanǵan. Al gúlder negizinen – qosalqy ónim. Qyzǵaldaqtar kesilip alynǵan kóshetke endi qııar otyrǵyzylmaq. Názik jandylar qaýymyna trıýmf-qyzǵaldaqtar, lalatústes qyzǵaldaqtar, shashaqty, jasyl tústi, darvındik, gıbrıd jáne ózge de qyzǵaldaq túrleri qýanysh syılaıtyn bolady.
Bas agronom sondaı-aq, kesip alynǵan qyzǵaldaqtardyń ómirin uzartýdyń qupııasyn da asha ketti. Eń birinshi gúldi sýǵa salmas buryn mindetti túrde sabaǵyn qıǵan durys. Sý óte sýyq bolýy tıis, sonda qyzǵaldaqtar uzaq ýaqyt solmaıdy eken. Jáne gúl turǵan qutyny kún sáýlesinen alys ustaǵan jón jáne sýǵa qant nemese aspırın qosýǵa bolady. Sýyn toltyryp tursa, gúl bir aptadan artyq óziniń tabıǵı qalpyn saqtap tura bermek.
Mıras ASAN,
«Egemen Qazaqstan»
QARAǴANDY