«Kamp Noýdaǵy» keremet

ÝEFA-nyń jyl saıyn ótkizetin klýbtar arasyndaǵy 1/8 fına­lyn­daǵy qarymta kezdesýler álem chempıonatynan kem túspeıdi. Qatardyń Nasser Ganım ál-Helaıfı esimdi bıznesmeni satyp alǵan PSJ klýby osydan úsh apta buryn óz alańynda ataqty «Barselonany» 4:0 esebimen oısyrata utqan edi. Parıj komandasy katolonııalyqtardy jarystan erte shyǵaryp tastaıtyn boldy ǵoı dep biraz tańdaı qaqqanbyz. Bul jeńilis «Barselonanyń» bas bapkerine qatty batqan sekildi. Maýsym aıaqtalǵan soń, kelisim­shartty sozbaıtynyn, komandadan ketetinin málimdep úlgergen bolatyn Lýıs Enrıke sabaz... Árıne, Chempıondar lıgasynyń pleı-off básekesinde birinshi oıynda 0:4 esebimen utylǵan koman­da­lardyń eshqaısysy kelesi kezeńge shyǵa almaǵan. Biraq kóptegen sarap­­­shylar mundaı kambekti álemde jasaı alatyn jalǵyz ko­man­­da bolsa – ol «Barselona» degen. Mes­sı bastaǵan jigitter sol tań­­ǵajaıypty is júzin­de dáleldeı aldy. Bul kezdesýde alań ıeleriniń oıynyn órbitken, tarıhı jeńisine basty sebepker ádettegideı Messı emes, brazılııalyq Neımar boldy. Átteń, Peleniń izbasary sanalatyn fýtbolshyǵa turaqtylyq jetispeıdi. Keı oıyndarda múldem alańda bar-joǵyn baıqamaı qala­syń. Áıtpese, «Altyn dop» alýǵa da qaýqary bar jigit. Degenmen, bul matchta ol óziniń karerasyndaǵy eń úzdik oıyndarynyń birin ótkizdi. «Barselona» men PSJ ara­syndaǵy tartystyń «Kamp Noý­daǵy» bóliminde 7 gol soǵyldy. Onyń altaýy «Barselona» fýt­bol­­shylaryna tıesili. Tipti, Kavanı gol soqqanda da «Barse­lona» fýtbolshylarynyń saly sýǵa ketpedi, qaıta shıraı tústi. Fýt­bolda tóreshiniń sońǵy ys­qyry­ǵyna deıin oınaý kerektigine taǵy kózimiz jetkendeı boldy. Jeńis dobynyń avtory – Serhıo Roberto 93-mınýtta mergendik tanytty. PSJ úshin úlken ókinish. Kavanı, Dı Marııa, Draskler se­kildi juldyzdary bar komanda eki matchta 5 dop soqsa da, basym­dyqty ustap qala almady. Fýtbol sonysymen qyzyq, sonysymen áserli. Árıne, tóreshiniń PSJ qaq­pasyna penaltı belgileýi kúmándi kórinýi múmkin. Biraq, bul jaǵdaı «Barselonanyń» jeńisine kúmán keltire qoımas dep oılaımyz. Al Anglııanyń «Arsenal» klý­bynda minez joq ekenine, tipti bapkeri Vengerdiń shaý tarta basta­ǵanyna etimiz ábden úırenip ketti. «Zeńbirekshilerge» jerebe bul joly da joldas bolmady. Kezekti ret «Bavarııaǵa» qarsylas atanyp kórip edi. Eki oıynda qaqpasyna 10 gol jiberdi. О́z alańyndaǵy jeńilisi tipten uıat boldy. «Arsenalda» Loran Koselnı degen qorǵaýshy bar. Osy fransýz oıynshysyna kóp nárse baılanys­ty. Birinshi matchta 49-mınýtta jaraqat alyp, alańnan erte ketip edi. «Nemis mashınasy» qatarynan 4 gol soqqan sabaz. Bul joly ekinshi ret sary qaǵaz alyp, koman­dasyn tipten qıyn jaǵdaıǵa qaldyrdy. Sóıtip, Anchelottı shákirtteri 5 dop­ty birinen soń birin topyrlatty. Aıta ketý kerek, matchta tóreshi Anastasıos Sıdıropýlostyń jiber­gen qatelikteri de az emes. Biraq «Arsenaldyń» tym sharasyz­dyǵy jeńiliske syltaý bola qoı­mas. Al «Arsenal» bapkeri Arsen Ven­gerdiń ázirge komandadan ke­te qoıatyn jospary joq sekildi. «Bavarııa» men «Barselonadan» bólek, shırek fınalǵa «Real Madrıd» pen «Borýssııa D» komandalary da joldama aldy. Dortmýndtyń «Borýssııasy» óz alańynda «Benfıkany» iri eseppen utty. Bul oıynda Per-Emerık Obameıang het-trık jasady. Bir goldy Krıstıan Pýlıshıch soqty. «Real» qarymta oıynda da «Napolıdi» 3:1 esebimen tize búk­tirdi. «Basy altyn» qorǵaýshy Serhıo Ramos eki ret standarttan qaq­pa toryn búlk etkizgen edi. Biraq, bireýi qorǵaýshy Drıs Mer­tenske tıip ketip, avtogol bolyp jazyldy. Match nátıjeleri: «Arsenal» – «Bavarııa» – 1:5; Goldar: Teo Ýolkott, 20 (1:0). Robert Levandovskı, 55 – penaltıden (1:1). Aren Robben, 68 (1:2). Dýglas Kosta, 78 (1:3). Artýro Vıdal, 80 (1:4). Artýro Vıdal, 85 (1:5). «Napolı» – «Real» – 1:3; Goldar: Drıs Mertens, 24 (1:0). Serhıo Ramos, 51 (1:1). Drıs Mertens, 57 – óz qaqpasyna (1:2). Alvaro Morata, 90+1 (1:3). «Barselona» –PSJ – 6:1; Goldar: Lýıs Sýares, 3 (1:0). Leıvın Kıýrzava, 40 – óz qaqpasyna (2:0). Lıonel Messı, 50 – penaltıden (3:0). Edınson Kavanı, 62 (3:1). Neımar, 88 (4:1). Neımar, 90+1 – penaltıden (5:1). Serhı Roberto, 90+5 (6:1). «Borýssııa D» – «Benfıka» – 4:0; Goldar: Per-Emerık Oba­meıang, 4 (1:0). Krıstıan Pýlıshıch, 59 (2:0). Per-Emerık Obameıang, 61 (3:0). Per-Emerık Obameıang, 85 (4:0). Bek TО́LEÝOV, jýrnalıst