Chempıon birinshilikti jeńilispen bastady

Fýtboldan Qazaqstannyń 26-shy chempıonaty sensasııamen bastaldy dese de bolady. Sońǵy jyldary aıdarynan jel esip júrgen «Astana» ońtústik óńiri­ne baryp, Shymkenttiń «Orda­basy» komandasynan 0:3 esebimen ońbaı jeńildi. Munyń aldynda elordalyq klýb elimizdiń Sýper­kýbogy úshin bolǵan synda «Qaırat­tyń» aldynda tize búkken edi. Esin jııa almaǵan eken... Shyntýaıtyna kelgende, bul matchta «Astananyń» basymdyǵy baıqalǵan. Birneshe márte qaqpa aldynda qaýipti sátter týǵyzdy da. Biraq, jeme-jemge kelgende, áreketiniń bir de birin golǵa aınaldyra almaı, álsizdik tanytty. Sóıtip, Mardan Tólebek (15-mınýt) pen Azat Nurǵalıev (75-shi) já­ne Abýlaı Dıakate (88-shi) soq­qan jaýapsyz úsh gol «Orda­basy» klýbyna iri jeńis ákeldi. Maýsymashar oıynda «Tobyl­dyń» da aıy ońynan týdy. Qosta­naılyqtar óz alańynda «Aty­raýdy» 3:0 esebimen oısyrata utyp, bıylǵy alamanǵa jan-jaqty daıyn­dyqpen kelgenin ańǵartty. Bul oıyndaǵy úsh goldyń da avtory Alekseı Shetkın bolǵanyn aıta ketý kerek. Demek, bul – bıyl­ǵy chem­pıonattaǵy tuńǵysh het-trık. Alǵashqy týrda Almatynyń «Qaıraty» da úsh upaı oljalady. «Aqtóbemen» arada asa tartysty ótken oıynda alań ıeleri Jerar Goý soqqan jalǵyz doptyń arqa­synda jeńiske jetti. О́tken jylǵy chempıonattyń qola júldegeri «Ertis» Pavlo­dar­da «Aqjaıyq» fýtbol klý­byn qabyldaǵan bolatyn. Ekinshi taım bastalmaı jatyp «Ertistiń» shabýylshysy Aslan Darabaev esep ashty. Osy esep kezdesýdiń 84-shi mınýtyna deıin ózgermeı turǵan edi. Alaıda, Freddı Koro­nel Ortız alystan teýip, týra «toǵyzdyqtan» dop kirgizdi de, tarazy basyn teńestirip ketti. Arada tórt mınýt ótkende qonaq­tar­dyń qorǵaýshysy aıyp ala­ńynda Nurbol Jumasqalıevti shalyp jyǵyp, tóreshi penaltı belgilegen bolatyn. On bir metrlik aıyp dobyn oryndaýǵa kelgende Stefan Jıvkovıch mergendik tanytty. Esep – 2:1. «Qaısar» óz alańynda «Oqjet­pesten» 1:0 esebimen basym tússe, «Taraz» ben «Shahter» arasyndaǵy match 0:0 esebimen teń aıaqtaldy. Premer-lıganyń ekinshi týry 12 naýryzda ótedi. Bul kúni «Qaı­sar» – «Taraz», «Qaırat» – «Oqjet­pes», «Tobyl» – «Aqtóbe», «Orda­basy» – «Atyraý», «Ertis» – «Astana» jáne «Aqjaıyq» – «Shah­ter» komandalary jasyl alań ústinde kúsh synasyp, ózara kim myq­tyny anyqtaıdy. Qaırat ÁBILDINOV, «Egemen Qazaqstan»