Aqtóbe oblysynda 600 mln tekshe metrden astam sýdy qabyldaýǵa múmkindigi bolatyn 10 sý qoımasy salynbaq, dep habarlady oblys ákimdiginiń baspasóz qyzmeti.
О́ńirde sýarmaly jerler alańyn keńeıtý úshin sý qoımalaryn qaıta qurý jumystary jalǵasýda
Eske sala keteıik, 2016 jyly Berdibek Saparbaevtyń bastamasymen sýarmaly jerler alańyn keńeıtip, Aqtóbe qalasyndaǵy jasyl jelekterdi sý resýrstaryn ońtaıly paıdalana otyra únemi sýarýǵa múmkindik beretin jobany júzege asyrý bastalǵan bolatyn. Aqtóbe oblysynyń ákimi Berdibek Saparbaev Sazdy sý qoımasynyń qaıta qurý barysyn qarap shyqty. «Qazsýshar» RMK Aqtóbedegi bólimshesiniń basshysy Bekzat Nametov qazirgi tańda 49 jyl paıdalanynylyp, tozyǵy jetken sý qurylysynyń keıbir bóliginiń qaıta jasaqtalatynyn aıtty. Júrgizilgen jumystardyń nátıjesinde sý qoımasynyń syıymdylyǵy qazirgi 6 mln tekshemetrden 7,5 mln. tekshe metrge deıin, al sý qoımasynyń sýarýshy múmkindigi 400 gektardan, 1 000 gektarǵa deıin artpaq. Artyq sý Sazdy ózenine quıylyp, Aqtóbe qalasyndaǵy jasyl jelekterdi, gúlzarlardy aýyzsýdy shyǵyndamaı-aq únemi sýaryp otyrý máselesi sheshiledi. Sý qoımasyn úıindiler men shógindilerden tazartý, sý eseptegish quraldaryn qondyrý, toǵandardy, kúzet beketteri men beınebaqylaýlardy syrtqy jaryqtandyrý jáne ishki elektrmen jabdyqtaý sharalary jalǵasýda. Aǵymdaǵy jyly toǵandardyń jotalaryna dabyl baǵandaryn ornata otyryp, asfalttaý jáne t.b. josparda bar. Qaıta qurýǵa bólingen 131, 8 mln. teńgeniń 118,3 mln teńgesi qurylys-montajdaý jumystarynajumsalady. 2016 jyly 30 mln teńge ıgerilse, osy jyly quny 88,1 mln teńge bolatyn is-sharalardy júzege asyrý josparlanýda. - О́ńirdegi jumys jasap turǵan sý qoımalarynyń tehnıkalyq jaǵdaıyn ári qaraı jaqsartý sharalaryn qolǵa alyp, AО́K salasyndaǵy 2017-2021 jyldarǵa arnalǵan memlekettik baǵdarlamasy aıasynda salynatyn 10 jańa sý qoımasynyń qurylysynyń máselesin tezirek sheshý qajet. Bul sýarmaly jerler alańyn, sý qoryn keńeıtýge múmkindik beredi,-dep Berdibek Saparbaev jaýapty jergilikti atqarýshy organdarǵa tapsyrma berdi. Belgili bolǵandaı, birinshi kezeńde sýarmaly jerler alańy 18700 gektardan 40 myńǵa deıin, ekinshi kezeńde alań 70000-80000 gektarǵa deıin artpaq. Sonymen qatar, 10 jańa sý qoımasy 600 mln tekshe metr qardy qabyldaı alatyn bolady. Aımaq basshysynyń bastamasymen Aqtóbede sonymen birge Sazdy ózenin Aqtóbe sý qoımasymen jalǵaıtyn 11 shaqyrymdyq sý burǵyshtyń qurylysy boıynsha jumystar jalǵasýda. Sý burǵysh arqyly artyq sý ózenge quıylyp, qosymsha sý taratqyshty ornatý arqyly oblys ortalyǵyndaǵy jasyl jelekterdi kútip-baptaý úshin paıdalanylmaq. Aqtóbe qalasynyń ákimdigi jumys jobasyn jasaýda. Aqtóbe qalasyndaǵy jalyq aýmaqty keńeıtý men jóneltýdiń baǵdarly quny 2,5 mlrd teńgeni quraıtyn bolady. Qarjylandyrý kózi – Eýropalyq qaıta qurý jáne damý banki. Sonymen qatar, óńir basshysy qardy toqtatý jumystaryn kúsheıtýdi tapsyrdy.