Qazaqstan Respýblıkasy Ulttyq ekonomıka mınıstrliginiń Statıstıka komıteti 2017 jylǵy aqpanda turǵyn úı naryǵyndaǵy baǵanyń ózgerýi jaıly málimet keltirdi.
Komıtettiń habarlaýynsha, 2017 jylǵy aqpanda ótken aımen salystyrǵanda jańa turǵyn úılerdi satý baǵalary 0,4 paıyzǵa tómendedi, al abattandyrylǵan turǵyn úıler baǵasy ózgerissiz qaldy. Al abattandyrylǵan turǵyn úıdi jalǵa alý tólemi 0,4 paıyzǵa joǵarylaǵany aıtylady.
Naýryz aıyna keler bolsaq, qaıtalama naryqtaǵy baspana baǵasy taǵy tómendeıdi. Homsters.kz taldaý ortalyǵynyń mamandary osyndaı boljam jasap otyr.
“Teńgeniń aqpandaǵy nyǵaıýy qaıtalama naryqta baǵanyń tómendeýine áser etti, al jańa úıler naryǵyndaǵy sharshy metr quny ózgergen joq. Naýryz aıynda qaıtalama naryqtaǵy baǵa tómendeı beredi”, – delingen boljamda.
Mamandardyń málimetinshe, aqpan aıynda respýblıkamyzdyń iri qalalary men óńirlerindegi qaıtalama naryqta baǵa aıtarlyqtaı tómendeı bastaǵan. Baspananyń arzandaýy, ásirese, aıdyń ekinshi jartysynda ulttyq valıýtanyń 1 AQSh dollaryna 312 teńge deńgeıinde nyǵaıǵan kezinde baıqaldy.
Baǵanyń tómendeýi ár óńirde birkelki bolǵan joq. Mysaly, Homsters.kz sarapshylarynyń málimetinshe, qaıtalama naryqtaǵy baspananyń bir sharshy metriniń ortasha baǵasy bylaısha tómendedi:
• Astanada – 1,1 paıyz, 333,4 myń teńgege deıin,
• Almatyda – 2,7 paıyz, 350,3 myń teńgege deıin,
• Shymkentte – 3,8 paıyz, 203 myń teńgege deıin,
• Qaraǵandyda – 1,3 paıyz, 197,7 myń teńgege deıin.
Mundaı dınamıkaǵa ulttyq valıýtanyń 4 paıyzǵa, ıaǵnı 1 AQSh dollaryna 326-dan 312 teńgege deıin nyǵaıýy negizgi sebep boldy. Biraq qaıtalama naryqtaǵy baǵa teńge baǵamy dınamıkasymen salystyrǵanda baıaý tómendedi.
“Eger aqpan aıynyń basynda satýshylar teńgeniń nyǵaıý úrdisiniń qalaı bolatynyn kútse, aıdyń ortasynda úrdistiń saqtalǵanyn kórip, óz nysandarynyń baǵasyn túsire bastady. Alaıda ádettegideı baǵany teńge baǵamyna qaraǵanda baıaý tómendetti – el boıynsha ortasha baǵanyń tómendeýi 2-2,5 paıyz bolsa, teńgeniń nyǵaıýy – 4,2 paıyz. Bul jaıt satýshylarǵa satyp alýshylardy óz nysandarymen qyzyqtyra túsýge jáne sonymen birge dollardyń quldyraýynan utylmaýǵa kómektesti, óıtkeni baspana ıeleriniń kóbi burynǵysynsha óz nysandarynyń qunyn belgileýde dollarǵa súıenedi”, – dep túsindiredi Homsters.kz jyljymaıtyn múlik satý onlaın-servısiniń basqarýshy seriktesi Marııa Ren.
Aqpanda jańa baspanalar baǵasy ózgergen joq, bul bastapqy naryqtyń shetel valıýtasyna asa táýeldi emes ekenin kórsetedi. “Úı salýshylardyń kóbi, ásirese, iri kompanııalar baǵany teńgemen belgileýge áldeqashan kóshti. Dollarǵa baılanǵan baǵany záýlim úıler salýǵa mamandanǵan jáne qurylys pen árleýge qajetti materıaldardy shetelden tasıtyn sanaýly kásiporyn ǵana saqtap otyr”, – deıdi Marııa Ren.
Naýryz aıynda sarapshylar jańa baspanalar naryǵynda turaqtylyq saqtalyp, qaıtalama naryqta baǵa odan ári tómendeıdi dep boljaıdy, biraq onyń qarqyny valıýta naryǵyndaǵy ahýalǵa baılanysty bolmaq. Eger teńge odan ári nyǵaıa berse, biz baǵanyń bir aıda 1-2 paıyzǵa tómendeıtinin baıqaımyz, al valıýta naryǵyndaǵy ahýal turaqty bolsa, baǵanyń 0,5-0,7 paıyzdan artyqqa tómendeýi ekitalaı.