«Egemen Qazaqstan» Ulystyń uly kúni – Naýryz merekesi qarsańynda, qoǵamdyq mán-mańyzy zor birqatar aqparattyq-ımıdjdik jobalardyń tanystyrylymyn jasaýdy josparlap otyr. Sıfrly Qazaqstan baǵdarlamasynyń jobasy aıasynda iske asyrylatyn sharalardyń alǵashqysy – «Egemen Qazaqstan» gazetiniń arhıvtegi barlyq nómirin túgendeý jáne túgeldeı sıfrly nusqaǵa kóshirý. Bul jumystar bas basylymnyń 100 jyldyq mereıtoıyna oraı qolǵa qolǵa alynǵan bolatyn. Joba aıasynda gazettiń 1919 jyly 17 jeltoqsanda alǵash «Ushqyn» degen ataýmen shyqqan kezinen bastap, «Eńbek týy», «Eńbekshil qazaq», «Eńbekshi qazaq», «Sosıaldy Qazaqstan», «Sosıalıstik Qazaqstannan» «Egemen Qazaqstanǵa» deıingi sıfrly muraǵaty jınaqtalady.
«Egemen Qazaqstan» gazeti tanystyratyn ekinshi joba «Sıfrly Qazaqstan: Máńgilik El muralary» dep atalady. Ýıkı-Bilim qorymen birlesip atqarylatyn bul joba elimizdiń ǵalamtordaǵy aqparattyq-ımıdjdik bet-beınesiniń tanylymyn arttyrýǵa baǵyttalǵan. Munda «Egemenniń» asa baı fotomuraǵatynda saqtalǵan, el tarıhynan, táýelsizdiktiń syndarly sátteri men jarqyn jetistikterinen habar beretin, sondaı-aq Elbasy men ózge de kórnekti memleket jáne qoǵam qaıratkerleri, Qazaqstannyń qalalary men kórikti mekenderi týraly sırek fotosýretter ǵalamtor paıdalanýshylaryna usynylatyn bolady. Bul jobanyń bir artyqshylyǵy - sıfrly qalypqa kóshirilgen sýretter Wikimedia Commons repazıtorıı júıesine júkteledi.
Sondaı-aq osy kúni egemen.kz jańa portalynyń jobasy tanystyrylady. Atalǵan portal zaman talabyna saı sońǵy mýltımedıalyq múmkindikterdi eskere otyryp ázirlengen.
Is-shara naýryzdyń 13-i kúni Astanadaǵy Ulttyq akademııalyq kitaphanada saǵat 11.00-de bastalady. Kelem deýshilerge esik ashyq.