Investısııalar jáne damý vıse-mınıstri R.Sklıardyń tóraǵalyǵymen elimizdegi jetekshi áýe tasymaldaýshylardyń qatysýymen ushýlardyń qaýipsizdigin qamtamasyz etý máseleleri boıynsha jedel keńes ótti, dep habarlaıdy mınıstrliktiń baspasóz qyzmeti.
Keńes keıingi ýaqytta qazaqstandyq áýe kompanııalardyń ushaqtaryndaǵy aqaýlardyń jıilep ketýine baılanysty ótkizildi.
Sharaǵa «Air Astana», «Bek Air» jáne «Qazaq Air» kompanııalarynyń ókilderi shaqyryldy. Jıyn qorytyndysy boıynsha Azamattyq avıasııa komıteti tóraǵasynyń orynbasary Talǵat Lastaev keleńsiz oqıǵalardyń qaıtalanýyna jol bermeý úshin mınıstrlik júrgizip jatqan jumystarǵa qatysty túsinik berdi.
«Ushaq qozǵaltqyshynyń toqtap qalýynan jáne navıgasııalyq qural-jabdyqtardaǵy aqaýdan týyndaǵan oqıǵanyń sebepterine qatysty, sondaı-aq qazirgi ýaqytta áýe kompanııa qabyldaǵan sharalar týraly jan-jaqty esep tyńdaldy. Osyǵan baılanysty jumystardy kúsheıtý jáne keleshekte mundaı keleńsiz oqıǵalarǵa jol bermeý týraly tıisti tapsyrma berildi. Qazirgi ýaqytta tıisti buıryq shyqty. Kóliktegi oqıǵalardy tekserý jónindegi departament osy úsh oqıǵany muqııat tekserýde. Tekserýge qatysty málimetter daıyn bolǵan kezde habarlaımyz» – dep atap ótti T.Lastaev.
Onyń aıtýynsha, oqıǵanyń sebepterin kompanııanyń ózi de, sondaı-aq, mınıstrliktiń kólik oqıǵalaryn tekserý jónindegi departamenti de jan-jaqty tekserip jatyr. Barlyq jaǵdaılar tirkelgen. Sonymen qatar, barlyq kompanııalarda ushýlardyń qaýipsizdigin basqarý jónindegi júıe engizildi.