Bıyl Ońtústik Qazaqstan oblysynda úıirli shegirtke tektes zııankesterge qarsy hımııalyq kúres sharalary 276 myń gektar alqapta júrgiziledi. Onyń 59 paıyzy, ıaǵnı 163,5 myń gektary jer ústi agregattarymen, 40 paıyzdan astamy avıasııamen, 1 paıyzǵa jýyq alqap aspaly búrikkishtermen óńdeledi. Bul týraly oblys əkimi Janseıit Túımebaevtyń tóraǵalyǵymen ótken jıynda Ońtústik Qazaqstan oblystyq aýmaqtyq ınspeksııa basshysy Núrken Badyraqov málim etti, dep habarlaıdy oblys ákimdiginiń resmı saıty.
Inspeksııa basshysynyń aıtýynsha, hımııalyq kúres sharalary byltyrǵydan eki ese artyǵymen atqarylatyn bolady. Onyń ishinde marokko shegirtkesine qarsy kúres sharalary 257,58 myń gektarda, azııalyq shegirtkege qarsy 12,4 myń gektarda, ıtalıandyq prýs shegirtkesine qarsy 5,92 myń gektarda júrgiziledi.
«О́ńdeletin alqaptyń 51 paıyzy, ıaǵnı 140,35 myń gektary Saryaǵash aýdanyna, 20 paıyzy nemese 56,3 myń gektary Arys qalasyna, 27,2 myń gektary Shardaraǵa, 7 paıyzǵa jýyǵy nemese 20,0 myń gektary Ordabasy aýdanyna, 8 myń gektary Báıdibek aýdanyna tıesili. Oblystyq aýmaqtyq ınspeksııa tarapynan óńdeý jumystarynyń sapaly júrgizilýin baqylaýǵa, uıymdastyrý jumystaryn júrgizýge aýdandar boıynsha 42 ınspektor jáne 18 avtokólik bólinedi», – dedi Ońtústik Qazaqstan oblystyq aýmaqtyq ınspeksııa basshysy N.Badyraqov.
Aıta keteıik, 257,58 myń gektar alqapta hımııalyq óńdeý jumystaryn júrgizý úshin 1574,7 myń gektar alqapta anyqtaý-zertteý jumystaryn júrgizý josparlanypty. Oǵan «Respýblıkalyq fıtosanıtarlyq dıagnostıka jáne boljamdaý ádistemelik ortalyǵy» memlekettik mekemesiniń oblystyq fılıaly tarapynan shtat boıynsha 58 adam bólinip otyr. Buǵan qosymsha 3 aıǵa ýaqytsha jumysqa tartý arqyly 33 adam tartylyp, barlyǵy 91 adam anyqtaý-zertteý jumystaryn júrgizedi.
Oblys ákimi úıirli shegirtkege qarsy kúres sharalaryn joǵary deńgeıde uıymdastyryp, zertteý-anyqtaý sharalaryn tyńǵylyqty ári sapaly júrgizý kerektigin eskertti.
«Úıirli shegirtkege jáne ózge de zııankesterge qarsy hımııalyq kúres sharalaryna asa jaýapkershilikpen qaraý kerek. О́ńdeý jumystaryna qajetti tehnıkalardy jáne mamandardy bólýdi aýdan jáne qala basshylaryna tapsyramyn», – dedi J.Túımebaev.
Anyqtaý-zertteý jumysyn sapaly júrgizý úshin aýdandyq, qalalyq jumyspen qamtý ortalyqtarynan qosymsha 287 anyqtaýshy bólinetin bolady. Marokko shegirtkesine qarsy hımııalyq óńdeý jumystaryna 71 dana jer ústi agregaty, 5 dana AN-2 ushaǵy qarastyrylyp otyr.
Jer ústi agregattarynyń óńdeý qýattylyǵy kúnine 100 gektar. Kúnine 7,1 myń gektar óńdelse, josparlanǵan 163,17 myń gektardy 23 kúnde aıaqtaýǵa bolady. Al, An-2 ushaǵynyń óńdeý qýattylyǵy kúnine 1,2 myń gektar. Ushaq kúnine 6,0 myń gektardy óńdese, josparlanǵan 99,71 myń gektardy 17 kúnde, jalpy hımııalyq óńdeý júmystary 23-25 kúnde aıaqtalady.