Almatyda 18 jastaǵy stýdent qyz bosanǵan nárestesin qoqys jáshigine tastap ketken. Tastandy sábıdi tańǵy ýaqytta qaladaǵy joǵary oqý oryndarynyń biriniń jataqhanasy mańynan ótip bara jatqan adam kórip qalǵan, dep habarlaıdy tengrinews.kz
Basylymnyń málimetinshe, sábı shamamen tańǵy saǵat altyda Baıtursynov kóshesinde Tóle bı men Qarasaı batyr kósheleriniń arasynan tabylǵan. О́tip bara jatqan adam polıseıler men jedel járdemdi shaqyrǵan. Dárigerler jańa týǵan sábıdi aýrýhanaǵa jetkizgen.
Birneshe saǵattan keıin polısııa qyzmetkerleri sábıdiń anasyn jaqyn mańdaǵy jataqhanadan tapty. Ol Qyzylorda oblysynyń týmasy bolyp shyqty, Almatydaǵy JOO-lardyń birinde 2-kýrsta oqıdy eken. Qyz aýyr jaǵdaıda bolǵandyqtan, oǵan medısınalyq kómek qajet bolǵan. Sodan ol jaqyn mańdaǵy qalalyq aýrýhananyń jansaqtaý bólimine jetkizilgen. Aldyn ala boljam boıynsha, ol sábıdi jataqhana bólmesinde ózi bosanǵan.
Almaty qalalyq densaýlyq saqtaý basqarmasy baspasóz qyzmetiniń málimetinshe, dárigerler sábıdi aman alyp qalý úshin baryn salǵan. Alaıda, ókinishke qaraı, sábıdiń ómirin aman alyp qalý múmkin bolmaǵan. Jańa týǵan sábı qatty álsirep, aýrýhanaǵa jetkizilgen soń kóz jumǵan. Tergeý amaldary júrgizilip jatyr.