Qostanaı oblysynyń turǵyny kólik urlap, onymen taksı qyzmetin kórsetip kelgen, dep habarlaıdy baq.kz
Qostanaı oblysyna qarasty Qostanaı aýdanyndaǵy Zatobol aýylynyń turǵyny kólik urlaǵany úshin buryn da sottalǵan bolyp shyqty. Naýryzdyń 7-nen 8-ne qaraǵan túni arnaıy jasaq ókilderi men jol polısııasy qyzmetkerleri kólik urlaǵan azamatty qolǵa túsirdi. Kúdikti kólikti qoldy qylǵanymen qoımaı, onymen birshama nápaqa tabýdy da jón sanap, oblys aımaǵynda taksı qyzmetin kórsetip júrgen eken.
«Kólik uralanǵany týraly habardy estigen soń túngi saǵat 02:00 shamasynda jergilikti dámhanalardyń biriniń janynan urlanǵan kólikke uqsas avtomobıldi kórdik. Kólikti toqtatqanymyzda ony júrgizip kele jatqan azamat Zatobol qalasynda turatynyn, taksı júrgizýshisi ekenin jáne qala syrtyna qaraı ketip bara jatqandyǵyn aıtty. Ol buryn da kólik urlaǵany úshin birneshe márte sottalǵan bolyp shyqty», – dep atap ótti Qostanaı oblystyq IID arnaıy jasaǵynyń aǵa leıtenanty Aleksandr Popov.
Ustalǵan azamat óziniń jasaǵan zańsyz áreketterin aldymen moıyndamaı qoıǵan. Polısııa qyzmetkerleri ony «Arman» stasıonarlyq beketine alyp kelip, istiń mán-jaıyn anyqtaý úshin jedel-izdestirý tobyn shaqyrǵan.
Aıta keteıik, jyl basynan beri Qostanaı oblysynda 22 kólik urlyǵy ashylǵan.