Atyraýda búgin keshkisin ondaǵan adamdar «Nasıha» iri saýda ortalyǵynda taraǵan belgisiz gazdan ýlanyp qaldy, dep habarlaıdy QazAqparat
«Men basynda ne bolǵanyn túsinbeı qaldym. Býtıkte otyryp, bir mezette eldiń barlyǵynyń jótele bastaǵanyn baıqadym. Aldymen qandaı da bir aýrý tarady ma degen oı keldi. Sodan soń belgisiz ıisti sezip, tamaǵym jybyrlap ketti. Biz birden dalaǵa júgirip shyqtyq, syrtta taǵy ondaǵan adamdar jınalyp turdy. Olardyń keıbiri jótelip qana qoımaı, demderi de jetpeı jatty. Biraz ýaqyttan soń polısııa qyzmetkerleri keldi», – dedi oqıǵanyń kýágeri Áıgerim Maqasheva.
Saýda ortalyqta bireýlerdiń belgisiz gazdy shashqanyn polısııa da rastady.
«Buzaqylyq áreketi boıynsha qylmystyq is qozǵaldy. Jedel-tergeý toby tekserý jumystaryn júrgizip jatyr. Gazdan ýlanyp, aýrýhanaǵa jetkizilgen adamdar týraly habar bolǵan joq», – dedi ishki ister departamentiniń ókilderi.