«Bıznestiń jol kartasy – 2020» baǵdarlamasy aıasynda nesıe alyp, otandyq kıim tigýdi bastaǵan «Dalatex» kompanııasy búginde óz ónimin shetelge eksporttaýda, dep habarlaıdy QazAqparat
«Dalatex» kompanııasy erler jeıdesin tigýdi osydan bir jyl buryn qolǵa alǵan. Kópshiliktiń kózaıymyna aınalǵan seh búginde óz ónimin Qazaqstannyń barlyq aımaqtaryna, tipti, Reseıge de eksporttap otyr. «Dalatex» brendi keń úlgide, qynama beldi jáne jartylaı uzyndyqtaǵy úlgimen ártúrli matalardan erler jeıdelerin usynady.
Fabrıkanyń negizin qalaýshy Dilmuhamed Abızov bıznes jolyn 20 jyl buryn bastaǵan. Ol kásibin damytý maqsatynda «Bıznestiń jol kartasy – 2020» baǵdarlamasy aıasynda 14 paıyzben 30 mln teńge nesıe alǵan, onyń 10 paıyzdyq ústemesin memleket qaıtarymsyz negizde sýbsıdııalaýda.
«Men óz armanymdy júzege asyra alǵanyma qýanyshtymyn. Kúndelikti 200-den astam jeıde tigýdemiz. Al sheberlerimiz kóılektiń ár túrin usyna otyryp, talǵamy joǵary tutynýshylardyń tapsyrysyn oryndaýda. Bizdiń ónimdi jergilikti halyq qana emes, ózge óńir turǵyndary da unatyp, satyp alýda. Bul – eńbegimizdiń jemisi», – deıdi kásipker.