Tarıhı qujatqa qol qoıyldy

Qazaqstan Prezıdenti Nursultan Nazarbaev 10 naýryzda «Konstıtýsııaǵa ózgerister men tolyq­ty­rý­lar engizý týraly» Zań­ǵa jarııa túrde qol qoıý rá­siminde sóz sóıledi, dep ha­barlady Prezıdenttiń bas­pasóz qyzmeti. «Egemen Qazaqstan» Elbasy sóziniń to­lyq mátinin usynady. Qadirli qaýym! Qurmetti qazaqstandyqtar! Biz búgin memleketimiz úshin máni zor tarıhı sheshimniń júzege asatyn sátine kýá bolamyz. Men Konstıtýsııaǵa ózgerister men tolyqtyrýlar engizý týraly zańǵa jarııa túrde qol qoıǵaly turmyn. Bul – qazirgi basqarý júıesin jańǵyrtýǵa bastaıtyn mańyzdy qadam. Zań bılik tarmaqtary ara­syndaǵy qarym-qatynasty kons­tı­týsııalyq deńgeıde teń­gerimdi etýge baǵyttalǵan. Onyń jobasy bir aı boıy qyzý qoǵamdyq talqylaýdan ótkenin bilesizder. Sonyń nátıjesinde jurtshylyq tarapynan 6 myńnan astam usynys kelip tústi. Arnaıy qurylǵan jumys toby bul usynystardyń barly­ǵyn saraptap qarap, bir tujy­rymǵa keldi. Biz kópshiliktiń Ata Zańdaǵy 26-bapqa ózgeris engizý jónindegi usynysqa qatysty pikirine erekshe mán berdik. Usynystardyń bári muqııat qaralǵan soń men túp­kilikti jobany Parlament qaraýyna engizdim. Parlamenttiń birlesken oty­rysynda eki ret qaralyp, qabyl­danǵan bul zań bılik tarmaqtary arasynda ókilettikterdi qaı­ta bóledi. Sol arqyly zań shyǵa­rýshy bılik pen Úkimettiń memlekettik basqarý júıesindegi jańa róli aıqyndalady. Biz ókildi organnyń quzyryn keńeıtip, Úkimettiń derbestigi men jaýapkershiligin arttyrdyq. Men qoǵamdyq talqylaýǵa belsene atsalysqan el azamat­tarynyń bárine shynaıy rıza­shy­lyǵymdy bildiremin. Son­daı-aq, jumys tobyna zor alǵys aıtamyn. Jumys tobyna memle­kettik qyzmetshiler, Par­lament depýtattary, zań­gerler, ýnı­ver­sıtetter basshy­lary qatysty. Par­lament depýtattary kóp usy­nys engi­zip, naqty jumys iste­di. Barlyq sharalar úshin rah­met aıtamyn. Zańmen jumys júr­gizip, mańyzdy mindet atqarǵan Par­­lament depýtattaryna da kóp rahmet. Osylaısha, Otany­myz­dyń basty qujaty kemeldene tústi. Konstıtýsııadan keıin qol­danystaǵy zańdarǵa ózgerister engiziledi. Osyǵan oraı tıisti jumystar júrgiziledi. Engizilgen zańdy men Kons­tıtýsııanyń talaby boıynsha Konstıtýsııalyq Keńeske jiberip, bul zańnyń Konstıtýsııaǵa jáne Qazaqstannyń zańdaryna saı ekeni jóninde taǵy da dáleldeme aldym. Endi zańǵa qol qoıyp, iske asyrýǵa bolady. Qurmetti qazaqstandyqtar! Búgingi reforma – mem­le­ke­timiz damýy­nyń zańdy ná­tı­jesi. Biz – óz memlekettiligin qurý ústindegi jas elmiz. Bizge ózgeris ústindegi dúnıe talaptaryna ekonomıkada da, sondaı-aq, saıa­sat­ta da jaýap berýimiz qajet. Prezıdent ókilettikteriniń birqatary bıliktiń basqa tar­maq­taryna beriledi. Úkimet qabyl­daıtyn sheshimderi úshin óziniń jaýapkershiligin kúsheı­tedi. Parlament Úkimet pen atqa­rýshy organdardyń qyzmet­terin baqylaý úshin jańa ókilet­tik­terge ıe bolady. Elimizdiń kons­tı­týsııalyq qurylysy, egemen­digi men táýelsizdigi myz­ǵymastyǵynyń kepildigi nyǵaıa túsetin bolady. Saıası júıe demokratııalylyq pen ornyqtylyqtyń úlken deń­geıine qol jetkizedi. Sonymen bir mezgilde, basqarýdyń prezı­denttik formasy Qazaqstan Respýblıkasynyń bazalyq irge­tasy bolyp qalady. Zań jobasyn talqylaý barysynda jurtshylyq prezıdenttik bıliktiń álsi­reýine qatysty ózderiniń alań­daý­­shylyqtaryn bildirdi. Bar­shany elimizdiń tutastyǵy, memle­ketimizdiń turaqtylyǵy, halqy­myzdyń birligi men dosty­ǵy tolǵandyrady. Bılik teńgerim­dilirek, ıkemdirek jáne tıimdirek bola túsedi. Qabyldanatyn ózge­rister óziniń máni jóninen júıe­li, olar keń qoǵamdyq rezonans týǵyzyp, qoldaýǵa ıe boldy. Jumys tobynyń múshelerine, Parlament depýtattary men barsha qazaqstandyqtarǵa kons­tıtý­sııalyq reformalardy júzege asyrýdaǵy qoldaýy men baǵa jetkizgisiz úlesteri úshin shyn kóńilden shyqqan rızashy­lyǵym men qurmetimdi bildire­min. Men sondaı-aq, Otan ıgiligi jolyndaǵy eńbegimdi halyq qalaý­lylarynyń Konstıtýsııaǵa erekshe túzetýmen atap ótýdi usyn­ǵanyn oń baǵalaımyn. Bul hal­qymyzdyń múddesi úshin re­formalardy ári qaraı júrgizýge yntalandyryp, senimdilik pen kúsh-qýat beredi. Joldaýda aıtylǵanyndaı, búgingi kúngi jedel tehno­lo­gııa­lyq revolıýsııa jahandyq ekono­mıkada jańa shynaıy ómir qa­lyp­tastyryp otyr. Jańar­tylǵan Konstıtýsııa – bul ýaqyt syn-tegeýrinine bizdiń jaýa­bymyz. Strategııalyq maqsat – álemdegi asa damyǵan 30 eldiń qata­ryna enýge qol jetkizý úshin Qazaqstannyń barlyq azamat­taryna ózderiniń kúsh-jigerlerin biriktirý mańyzdy. Bárimiz birge HHI ǵasyrda eli­mizdiń tabysty damýyn, hal­qy­myzdyń ósip-órkendeýin qam­tamasyz ete alatynymyzǵa senim­­dimin. Reformanyń negiz­gi maq­saty da osy – birligi­miz­di, dostyǵymyzdy, ózara túsi­­nis­­­tigimizdi, azamattardyń et­nos­tyq, tildik jáne konfes­sııalyq qaǵıdattar boıynsha teń­­digin saqtaý. Osy toptasqan­dyǵy­myz­dyń arqasynda biz talaı márte jeńisterge jettik. Osy postý­lattarǵa súıene otyryp, biz jańa jeńisterge jetetin bola­myz. Barlyq qazaqstandyqtardy bizdiń egemendi saıası tarı­hy­myzda jańa kezeń ashatyn Negizgi Zańǵa ózgerister qabyldanýymen quttyqtaımyn. Sýret Prezıdenttiń baspasóz qyzmetinen alyndy