Oral qalasyndaǵy Dostyq úıinde Qazaqstan halqy Assambleıasynyń respýblıkalyq biryńǵaı kúni sheńberinde Batys Qazaqstan oblystyq QHA aktıvi jáne qurylymdyq bólimsheleriniń tóraǵalary men músheleri konstıtýsııalyq reformany qoldaýǵa arnalǵan dóńgelek ústel májilisin ótkizdi.
– Elbasynyń qoly qoıylyp, zańdy kúshine engen Qazaqstan Respýblıkasynyń jańarǵan Konstıtýsııasy – el damýyndaǵy tarıhı oqıǵa. Biz osy tarıhı sáttiń kýágeri bolyp otyrmyz, – dedi Batys Qazaqstan oblysy Qazaqstan halqy Assambleıasy tóraǵasynyń orynbasary-hatshylyq meńgerýshisi Ǵaısa Qapaqov.
«Halyq arasynda bir aı boıy talqylanyp, 6 myńdaı usynys-pikirden keıin Ata Zańǵa engizilgen 26 túzetý men tolyqtyrý búgingi kún talabynan týǵan». Jınalǵandar bir aýyzdan osyndaı sheshimge keldi. Assambleıa keńesiniń múshesi, tarıh ǵylymdarynyń kandıdaty, M.О́temisov atyndaǵy Batys Qazaqstan memlekettik ýnıversıtetiniń jalpy tarıh jáne áleýmettik-saıası pánder kafedrasynyń dosenti Zahot Mýhlısova bılik tarmaqtarynyń ara salmaǵy ár kezeńde ártúrli bolatynyn aıtady. Ǵalymnyń pikirinshe, 1995 jyly Konstıtýsııaǵa bıliktiń vertıkal pármendiligin engizý sol kezeńdegi Qazaqstannyń saıası-áleýmettik jaǵdaıyna oraı jasalǵan eń durys qadam bolǵan. Bul pikirdi «Aýyl» partııasy BQO fılıalynyń jetekshisi Amangeldi Baıanov, Oral qalasy ákimi janyndaǵy qoǵamdyq kelisim keńesiniń tóraǵasy Borıs Chebakovtar da qoldady.
– Budan buryn da Qazaqstan Konstıtýsııasyna ózgerister men tolyqtyrýlar engizilgen. Esterińizde bolsa, osyndaı ár reformadan keıin elimiz erekshe damyp, tyń serpilis jasap keledi. Sondyqtan, bul joly da solaı bolatynyna kúmánimiz joq. Konstıtýsııalyq reformany Qazaqstan halqy Assambleıasy músheleri bir aýyzdan qoldaıdy, – dedi Ǵaısa Qapaqov.
Jıyn sońynda Batys Qazaqstan oblystyq Qazaqstan halqy Assambleıasynyń úndeýi qabyldandy.
Qazbek QUTTYMURATULY,
«Egemen Qazaqstan»
ORAL