О́skemendegi Dostyq úıi-qoǵamdyq kelisim ortalyǵynda Qazaqstan halqy Assambleıasynyń konstıtýsııalyq reformany qoldaý boıynsha respýblıkalyq biryńǵaı kúni sheńberinde óńirdegi etnomádenı birlestikter men jergilikti quqyq qorǵaý organdary ókilderiniń qatysýymen dóńgelek ústel ótti.
Jıyndy ashqan Shyǵys Qazaqstan oblystyq Qazaqstan halqy Assambleıasy hatshylyǵynyń meńgerýshisi Asqar Nurǵazıev konstıtýsııalyq reformalar halyq arasynda bir aı boıy qyzý talqylanǵanyn, jumys tobyna 6 myńǵa jýyq usynys túskenin, jergilikti deńgeıde 10 myńǵa tarta kezdesý ótkenin, oǵan 2 mıllıonǵa jýyq adamnyń qatysqanyn tilge tıek etip, shyn máninde búkilhalyqtyq talqylaý bolǵanyn atap ótti.
– Búgin biz tarıhı sáttiń kýási bolyp otyrmyz. Memleket basshysy halyqtyń, eldiń bolashaǵy úshin asa mańyzdy, tarıhı sheshim qabyldady. Prezıdent ózine tıesili 35 ókilettigin Úkimet pen Parlamentke berý jóninde uıǵarym jasady. Erekshe atap óter jaıt, depýtattar tarapynan Tuńǵysh Prezıdent – Elbasynyń mártebesin Konstıtýsııada bekitý týraly usynys aıtylyp, qoldaýǵa ıe boldy.
Sebebi, Táýelsizdik pen Elbasy – egiz uǵym. Ekeýi de bizdiń aıbyndy memleketimizdiń aıshyqty bederi, – dedi dóńgelek ústelde sóz alǵan Memlekettik qyzmet isteri jáne sybaılas jemqorlyqqa qarsy is-qımyl agenttigi Shyǵys Qazaqstan oblysy boıynsha departamentiniń basshysy Baqtııar Qamalov. Oblystyq ishki saıasat basqarmasy basshysynyń orynbasary Irına Smıt Konstıtýsııaǵa engiziletin ózgerister men tolyqtyrýlardy talqylaýǵa óńir jurtshylyǵynyń belsendi at salysqanyna, aımaqta 3 myńǵa jýyq kezdesý ótkenine, buǵan 100 myńǵa tarta adamnyń qatysqanyna toqtalyp, bul iske óz úlesterin qosqan etnomádenı birlestikter men ǵalymdarǵa alǵysyn bildirdi.
«Árıne, munymen bári bitti deýge kelmeıdi. Alda úlken jumystar kútip tur. Biz halyqqa Konstıtýsııaǵa engizilgen ózgerister men tolyqtyrýlardy jan-jaqty túsindirý jumystaryn odan ári jalǵastyrýymyz kerek», dedi ol. Budan keıin sóz alǵan oblystyq sottyń qylmystyq ister jónindegi sot alqasynyń tóraǵasy Qaırat Chakpantaev búkilhalyqtyq talqylaýǵa sot salasy ókilderiniń de belsene qatysqanyn jetkizip, Konstıtýsııaǵa engizilgen ózgerister quqyq qorǵaý salasynyń jumysyna tyń serpin beretinine senim bildirdi.
Azamat QASYM, «Egemen Qazaqstan» О́SKEMEN
Sýretti túsirgen Ǵylymbek SÁBITOV