Elimizde konstıtýsııalyq reformalardyń júzege asýy, Parlament palatalarynyń birlesken otyrysynda «Qazaqstan Respýblıkasynyń Konstıtýsııasyna ózgerister men tolyqtyrýlar engizý týraly» Zańnyń qabyldanýy barsha qazaqstandyqtardyń oıy men kóńilinen shyǵyp otyr. Osy tarıhı sheshimge baılanysty Qazaqstan halqy Assambleıasy usynǵan respýblıkalyq biryńǵaı kún kestesine oraı Aqtóbe qalasynda «Konstıtýsııalyq reformanyń negizgi maqsaty» degen taqyrypta dóńgelek ústel ótkizildi. Aqtóbe oblysy ákimdigi apparaty qoǵamdyq kelisim memlekettik mekemesi uıymdastyrǵan basqosýǵa ǵalymdar, etnomádenı birlestikter men qoǵamdyq uıymdardyń jáne ǵylymı-saraptamalyq toptyń músheleri, zańgerler men memlekettik qyzmetshiler qatysty.
Dóńgelek ústelde alǵashqy sóz alǵan Q.Jubanov atyndaǵy Aqtóbe óńirlik memlekettik ýnıversıteti ekonomıka jáne quqyq ınstıtýty dırektorynyń orynbasary, zań ǵylymynyń magıstri Nurgúl О́rbisinova Ata Zańǵa engizilgen ózgerister ýaqyt talabynan týyndaǵanyn atap kórsetti. Ári búgingi qazaqstandyq qoǵamnyń jedel qarqynmen damý úrdisi de osyndaı qadamǵa barý qajettigin talap etkenine toqtaldy. Prezıdenttiń qolyndaǵy asa jaýapty birqatar ókilettikterdiń Parlament pen Úkimetke
aýysýy – memleketimizdiń ózgege uqsamaıtyn damý joly men modeline eshqandaı nuqsan keltire almaıdy. Mundaı jaǵdaıda bıliktiń atalǵan tarmaqtarynyń ókilettigi keńeıip, róli arta túsedi dep qorytty ol óz oıyn.
Sondaı-aq, Aqtóbe oblysy boıynsha medıasııany damytý ortalyǵynyń jetekshisi Sáýle Seıdahmetova konstıtýsııalyq reformanyń bitim-bolmysy men sıpatyna taldaýlar jasady. Halyq pen bıliktiń araqatynasyn aıqyndaıtyn basty Zań retinde sońǵy ózgeristerden keıin el Konstıtýsııasy qasańdyqtan arylyp, odan ári ajarlana túskenin aıtty. Keıingi kezde elimizde saıası jańǵyrtýlarǵa basa mán berilýde. Ony oıdaǵydaı iske asyrýǵa da konstıtýsııalyq reforma berik negiz qalaıdy, – dep túıin jasady Sáýle Radýlovna. Kezdesý kezinde Qazaqstan halqy Assambleıasy janyndaǵy ǵylymı-saraptamalyq ortalyq tóraǵasynyń orynbasary, fılosofııa ǵylymdarynyń kandıdaty Úmbethan Sársenbın konstıtýsııalyq reformanyń basty maqsaty, bılik tarmaqtaryn ózara teńdestirý, el aldyndaǵy aýyr júkti teń tartysý ekeni jóninde oı tarqatty. Ári ol prezıdenttik bılik vertıkaly saqtala beretini, sonymen bir mezgilde Parlamenttiń basqarý fýnksııasy kúsheıe túsetini, ekonomıkalyq máseleler jónindegi mindetter Úkimetke júktelgeni atalǵan reformanyń basty máni bolyp tabylatynyn jetkizdi.
Dóńgelek ústelge qatysýshylar konstıtýsııalyq reformanyń basty maqsaty men artyqshylyqtaryn atap kórsetip, ony biraýyzdan qoldaıtyndyqtaryn bildirdi.
Temir QUSAIYN,
«Egemen Qazaqstan»
Aqtóbe oblysy