Qatań synǵa alyndy

Qazaqstan delegasııasy Nıý-Iork qalasyndaǵy BUU shtab-páterinde Koreı Halyq-Demokratııalyq Respýblıkasynyń (KHDR) ústimizdegi jyldyń 6 naýryzda 4 ballıstıkalyq zymyran ushyrýyna baılanysty ótken BUU Qaýipsizdik Keńesiniń tótenshe otyrysyna qatysty, dep habarlady Syrtqy ister mınıstrliginiń baspasóz qyzmeti. Otyrysqa qatysýshylar KHDR bı­liginiń BUU Qaýipsizdik Keńesiniń tıis­ti qararlaryn kezekti túrde buzý áre­ketterin biraýyzdan qatań synǵa aldy. Qazaqstan Respýblıkasynyń BUU janyndaǵy Turaqty ókili Qaırat Oma­rov óz sózinde Soltústik Koreıanyń zy­myran ushyrý jáne BUU Qaýipsizdik Keńe­siniń qararlaryn qaıtadan óres­kel túrde buzý áreketterine zor alań­daýshylyǵyn bildirip, olardyń aı­maqtyq jáne jahandyq qaýipsizdikti nyǵaıtý baǵytyndaǵy ortaq halyq­ara­lyq kúsh-jigerlerdi joqqa shy­ǵa­ryp otyrǵanyn eskertti. Jıynda Qazaqstan tarapy Koreı túbegin ıadrolyq qarýdan azat etý qa­jet­tigine qaǵıdatty túrde qoldaý ta­nyta otyryp, Soltústik Koreıa máse­lesin tek beıbit saıası-dıploma­tııalyq kelissózder men senim shara­laryn qalyptastyrý, aldyn ala shart­tar­syz ashyq túrdegi dıalog qurý ar­qy­ly sheshý kerektigin atap ótti. Osy oraıda Q. Omarov beıbit jol­men sheshý múmkindikteri BUU Qaýip­sizdik Keńesiniń barlyq qararlary­nyń eń mańyzdy túıini ekendigin qaty­sýshylardyń esine saldy. Qazaqstan ókili aımaqtaǵy shıelenisti báseńdetýdi jáne qalyptasqan qaýyrt ahýaldy sheshýdi ilgeriletýge jeteleıtin naqty sharalardy oılastyrýǵa shaqyrdy. Otyrys sońynda Qaýipsizdik Keńe­siniń músheleri KHDR-ǵa qatysty sank­sııalardy oryndaýda kúsh-jiger­lerin eseleı túsýge kelisip, sonymen qatar, Koreı túbegindegi jáne tutas­taı Sol­tústik-Shyǵys Azııadaǵy beı­bit­shilik pen turaqtylyqty saqtaý mańyz­dylyǵyn quptady. Buǵan deıin BUU Qaýipsizdik Keńesi osy másele jóninde arnaıy málimdeme qabyldap, onda ballıstıkalyq zymy­ran ushyrýdy qatań synǵa alyp, bar­lyq memleketterdi KHDR-ǵa qatysty sanksııalardy oryndaý boıynsha tıisti sharalardy qabyldaýǵa shaqyrǵan bolatyn.