Sen-Tropede kúnde mereke

Fransııanyń Qazaqstandaǵy mádenı kúnderi máresine jetti Fransııanyń Qazaqstandaǵy mádenı kúnderi aıasynda Almatyda júrgen fransýzdar bul joly kýrorttyq Sen-Trope qalasynyń saltanatty lebin alyp kelipti. Sol sııaqty aıtýly kúnder aıasynda ózin fransýzdyq dep esepteýge haqysy bar 60-qa jýyq kompanııa The Ritz Carlton qonaqúıinde ashylǵan ekinshi Halyqaralyq «Regard de France» kórmesinen oryn aldy. Qazaqtar men fransýzdardyń dos­ty­ǵyn dánekerleýge umtylǵan osyndaı mádenı kúnder jaqsy dástúrge aınalyp keledi. Joǵaryda atap ótkenimizdeı, bıyl­ǵy mádenı sharalar sheńberinde Sen-Trope qalasy kóbirek nasıhattaldy. Má­denı kúnderdiń bastalýymen oraı­las Almatydaǵy Intercontinental qonaq­úıinde «Welcometo Saint-Tropez» atty tu­saýkeser sharalar ótip, oǵan osy baǵyt­taǵy týrızmdi damytýǵa múddeli 40 shaqty týrıstik agenttikter qatysty. BAQ ókilderimen kezdesýden bastaý alǵan Fransııanyń mádenı kúnderinde Sen-Trope qalasynyń týrızm jónindegi vıse-meri Anrı Prevo-Allar myrza bul qalanyń artyqshylyǵy jaıly qyzyqty áńgimeleı otyryp: «Sen-Tropede áıelder úshin kúnde mereke. Bul qalada qyz-kelinshekterge kórsetiletin syılastyq pen qurmet erekshe!» – dedi. Sondaı-aq, jýrnalıstermen emen-jarqyn suh­bat­tasqan Anrı Prevo-Allar álem kórer­men­deriniń erekshe qoshemetine bólen­gen áıgili fılmderdiń birqatary Sen-Tro­pede túsirilgenin baıandaı kele, qazaq kı­ne­matografısterin osy qalaǵa sha­qyrdy. Sol sııaqty Fransııanyń Qazaq­stan­daǵy Tótenshe jáne ókiletti elshisi Fransıs Eten men Fransııanyń Qazaq­standaǵy Bas konsýly Patrık Renar myrzalar eki eldiń barlyq baǵyttaǵy baı­la­nystarynyń ilgerileýi men ke­dergilerine qatysty saýaldarǵa jaýap berdi. Bul joly laýazymdy delegasııa alyp kelgen syılyqtardyń ishinde alma­tylyqtarǵa áıgili fransýz aktrısasy Brıd­jıt Bardonyń ómirine arnalǵan «Áıel­di Qudaı jaratqan» kórmesi unady. Máde­nı kúnder aıasynda Sen-Trope qalasy­nyń maqtanyshyna aınalǵan aktrısa basty rólde oınaǵan rejısser Roje Va­dımniń «Áıeldi Qudaı jaratqan» kórkem fılmi usynyldy. Eki eldiń baılanysyn bekemdeýge baǵyttalǵan sharalar legi kelesi kúnderi Shymbulaqta jalǵasty. Al Kóktóbede jańa­dan ashylǵan «Abaı» meıramhanasynda Sen-Trope qalasyndaǵy áıgili Bıb­los qonaqúıiniń maqtaýly aspazdary qonaq­tarǵa bar ónerin kórsetti. Fransııanyń Qazaqstandaǵy kezekti mádenı kúnderi aıasynda birqatar iskerlik kezdesýler uıymdastyryldy. Aınash ESALI, «Egemen Qazaqstan» ALMATY