Sybaılastyqpen qoǵam bolyp kúresken utymdy

Sońǵy jyldary sybaılas jemqorlyqpen kúres qyzý qarqyn alyp, qoǵamdy qoly taza emes jandardan aryltý jumystary jolǵa qoıylyp keledi. Sonyń bir dáleli Kókshetaýda «Jemqorlyqqa qarsy tuńǵysh medıa-ortalyq respýblıkalyq qoǵamdyq birlestigi ótkizgen «Jemqorlyqqa qarsy qoǵamdyq pikir men halyqtyń oıyn qalyptastyrýdaǵy qoǵamdyq uıymdar men BAQ-tyń róli» atty forým bolyp tabylady. Sybaılas jemqorlyqqa qar­sy birinshi forým Astana qala­synda ótkeni belgili. Bul – ekinshi shara. Endi uıymdastyrýshylar mundaı ıgi sharalardy elimizdiń ár óńirinde ótkizip turýdy kózdep otyr. Atalǵan sharanyń maqsaty – sybaılas jemqorlyqpen kúres úde­risindegi qoǵamnyń jáne qo­ǵamdyq uıymdardyń, buqaralyq aqparat quraldarynyń rólin kúsheıtý. Eń bastysy, el turǵyndarynyń sanasyna jemqorlyqtyń qoǵam men memleket úshin qaýiptiligin jetkizý. Memlekettik qyzmet isteri jáne sybaılas jemqorlyqqa qar­sy is-qımyl agenttiginiń sy­baı­las jemqorlyqqa qarsy kúres departamentiniń dırektory Salaýat Muqsımov jıynda jemqorlyq táýekelderi men sebepterin joıýǵa tolyq múmkindik bar ekendigin alǵa tartty. О́tken jyly qolda­nystaǵy zańnama aýqymdy ınven­tarızasııaǵa ushy­rap, sonyń nátıjesinde eki myńnan astam jemqorlyq táýekelderi anyq­talyp, sonyń myń jarymy joıylǵany erekshe ataldy. Endigi másele – sybaılas jemqorlyqtyń aldyn alýǵa qoǵam bolyp jumylý. Sybaılas jemqorlyq – tek quqyq­tyq kórinis qana emes, tereń ja­ǵym­syz is-áreket ekenin qoǵamǵa jetkizý jáne árbir memlekettik qyzmetkerge kórsetilgen senimge selkeý túsirýdiń aldyn alý. Aqmola oblysy ákiminiń orynbasary Nurlan Núrkenov elimiz táýelsizdik alǵan kezden bastap sybaılas jemqorlyqpen kúres júrgizip kele jatqandyǵyna nazar aýdartty. Elbasy «100 naq­ty qadam» Ult josparyna sáıkes naqty tapsyrmalar júk­tese, bıylǵy Joldaýynda sybaılas jemqorlyq deńgeıiniń tómendegenin málimdedi. Deı tur­ǵanmen, negizgi basymdyq áli sybaılastyq saldarymen kúreske baǵyttalyp keledi. Sondyqtan da bul iske qoǵamnyń barlyq ókilderi qatysqany mańyzdy. Bul rette barlyq azamattyq ınstıtýttardyń jáne azamattardyń sybaılas jemqorlyqqa qarsy kúresinsiz esh nátıje bolmaıtyny túsinikti. Basqosýda máseleniń osy jaǵyna basa nazar aýdaryldy. Asqar TURAPBAIULY, «Egemen Qazaqstan» Aqmola oblysy