— Jazda atamnyń aýylyna bardym. Sol kezde onyń kózi qaraýytyp, kórmeı bastaǵanyn baıqap, kóńilim kúpti bop júrdi. Bir qyzyǵy, atam árkez basynan taqııasyn tastamaıdy. Demalystan oralǵan soń, robototehnıka úıirmesinen sabaq beretin Baqytjan (Baqytjan Muhammed,- red) aǵaıǵa oıymdy aıttym, sóıtip jobany qolǵa aldyq. Osy jazda atama baryp, taqııany kıgizsem degen armanym bar. Ári bas kıim, ári baǵyt-baǵdar berýshi, – deıdi Aqtaýdaǵy Nazarbaev Zııatkerlik mektep oqýshysy Sáttiǵalı Joldasbaı.
Zaǵıp jandar SMART-taqııany kıgen kezde, aldynda turǵan kedergini birden bile alady. Iаǵnı, 4 metrge deıin qashyqtyqta qabyrǵa ne jar tursa, ıakı adam kele jatsa, taqııa aldyna ornatylǵan eki tetik (datchık) kedergini baıqap, birden qulaqtaǵy apparatqa vıbrasııalyq dybys jóneltedi. Sóıtip ony kıgen adam kedergiden burylyp ótip, toqtaıdy nemese baǵytyn ózgertedi. Keleshekte qazaqtyń qaradomalaq balasy oılap tapqan ulttyq naqyshtaǵy taqııa kóp zaǵıp jannyń qolyndaǵy taıaǵyn almastyrýy múmkin. Apparatty kez kelgen taqııaǵa ornatýǵa
bolady.
— Kórmede Astana jurtshylyǵy jańalyqty jyly qabyldady. Alǵashynda ózime senimsiz boldym. Qala turǵyndary kelip, taqııany kıip kórip, qyzyqty. Zaǵıp jandar taqııany kıip kórip, qýanyp jatqanda, ózgeshe bir sezimde bolady ekensiń. Qýanasyń, ári osy ıdeıa ári qaraı jalǵasyn taýyp, bar aǵa-apalarymyz taqııa kıse eken dep armandaısyń, – deıdi jas ónertapqysh.
Shynynda, kez kelgen ǵylymı joba adam ıgiligi úshin jasalýy tıis. Árıne, qurmetke muqtaj, zaǵıp jandarǵa kómektesý, olardyń ómir súrýine qolaıly apparat oılap tabý – úlken jaýapty, ári saýapty is. Endi Sáttiǵalı men joba jetekshisine SMART-taqııany qarapaıym jandarǵa kıgize otyryp, tájirıbeler júrgizip, kem-ketigin durystaý ǵana qaldy. Aldaǵy ýaqytta oqýshynyń taqııasy qarapaıym ómirde, qoldanysqa enip jatsa, onda maqsattyń oryndalǵany.
Aıgúl DÁDEN