Irannyń munaı mınıstri Bıjan Namdar Zangane ótken jyldyń jeltoqsanynda qabyldanǵan munaı óndirisi kólemin azaıtý týraly OPEK+ (uıymǵa múshe jáne múshe emes eksporttaýshy elder) elderiniń kelisimi jyldyń ekinshi jartysynan keıin de kúshinde bolýy múmkin ekenin aıtty.
Esterińizge sala keteıik, 2017 jyldyń 1 qańtarynan bastap atalǵan memleketter jyldyń birinshi jartysyna deıin munaı óndirisi kólemin táýligine 1,8 mln barrelge azaıtýǵa kelisken edi.
«Meniń oıymsha, OPEK músheleri men uıymǵa kirmeıtin eksporttaýshy elder kelisimniń shartyn jyldyń ekinshi jartysynan keıin de óz kúshinde saqtaýǵa múddeli bolyp otyr. Degenmen, naqty sheshimge kelý úshin ýaqyt kerek", - dedi mınıstr Máskeýge jasaǵan saparynda.
Iran osy kelisimdi sozýǵa múddeli me degen suraqqa Bıjan Zangane: «OPEK+ elderiniń barlyǵy bir aýyzdan kelisýi kerek dep oılaımyn» dep jaýap berdi.
О́tken apta sońy Kýveıtte OPEK+ elderi komıtetiniń munaı óndirisi kólemin qysqartý týraly kelisimniń oryndalýyn baqylaý jumysynyń otyrysy ótip, onda OPEK bas hatshysy Muhammed Barkındo kelisimniń oryndalý kestesine kóńili tolatynyn aıtqan edi.
Aıta keteıik, birer apta buryn Barkındo atalǵan 1,8 mln barrellik qysqartýdyń qazirgi tańda 93 paıyzǵa deıin oryndalǵanyn aıtqan bolatyn.
О́z kezeginde Qazaqstan ózine tıesili 20 myń barreldi artyǵymen oryndap tastaǵanyn habarlaǵan edik.