Jıynǵa QR eńbek jáne halyqty áleýmettik qorǵaý mınıstri Tamara Dúısenova, Ońtústik Qazaqstan oblysynyń ákimi Janseıit Túımebaev, Qostanaı, Pavlodar, Soltústik Qazaqstan jáne Shyǵys Qazaqstan oblystary ákimderiniń orynbasarlary, OQO qalalary men aýdandarynyń ákimderi, joǵaryda keltirilgen óńirlerdegi jumyspen qamtýdy jáne áleýmettik baǵdarlamalardy úılestirý basqarmalarynyń, halyqty jumyspen qamtý ortalyqtarynyń basshylary, jumys berýshiler jáne taǵy basqa da taraptar qatysty.
Forým jumysyn ashqan Ońtústik Qazaqstan oblysynyń ákimi Janseıit Túımebaev óńir halqynyń tyǵyzdyǵyna oraı, munda jyl saıyn aýyl sharýashylyǵy, kásipkerlik syndy mańyzdy salalarda atqarylyp jatqan jumystardyń jaıyna toqtaldy. Jyl sońyna deıin kúngeıden teriskeıge 400 myń tonnaǵa jýyq baqsha, 250 myń tonna kókónis, 15 myń tonna jemis-jıdek, 15 myń tonna júzim jóneltýge múmkindiktiń bar ekenin, sáıkesinshe, ol jaqtan bıdaı, kartop, mal azyqtyq jem ónimderdi almastyryp, óńiraralyq kooperatıvter júıesin qalyptastyrý joldaryna mán berý qajettigin jetkizdi.
«Búginde Ońtústiktiń baqshalyq ónimderi onsyz da myńdaǵan shaqyrymǵa tasymaldanyp, Reseıge ótkizilip jatyr. Al sol kókónisti ósirýdi soltústik óńirlerde jolǵa qoıyp, shekara asyrý áldeqaıda tıimdi bolady dep oılaımyn. Sonymen qatar sharýalar soltústikten ońtústikke jetkiziletin aýyl sharýashylyǵy ónimderin de molynan daıyndap, osynda jiberýine múmkindik týady. Bul óz kezeginde elimizdegi azyq-túlik naryǵyn retteýge ońdy yqpal etetindigi sózsiz», - dedi J.Túımebaev.
QR eńbek jáne halyqty áleýmettik qorǵaý mınıstri Tamara Dúısenova Elbasy halyqty jumyspen qamtý salasynda jańa jumys oryndaryn qurýdy basym baǵyt retinde aıqyndaǵanyn atap ótip, bıyl Qazaqstanda 630 myńnan astam jumys orny qurylatynyn jetkizdi. Bul rette, T.Dúısenova osy jyldyń 1 qańtarynan bastap «Nátıjeli jumyspen qamtýdy jáne jappaı kásipkerlikti damytý» baǵdarlamasyn júzege asyrý qolǵa alynǵanyn eske salyp, onyń árbir baǵyty boıynsha tolyqqandy túsindirip berdi.
«Budan túsinetinimiz, barshamyz, eńbek naryǵyn tıimdi retteý jolynda qaı óńirlerde, qandaı salalar men baǵyttarda qandaı jańa jumys oryndaryn qurý qajettigin naqty bilýimiz kerek. Bizdiń mınıstrlik ortalyq memlekettik organdarmen jáne óńirlermen birlesken raıda, memlekettik jáne salalyq baǵdarlamalar aıasynda júzege asyrylatyn jobalarda; jańa zańdy tulǵalar turǵysynda; eńbek resýrstarynyń ózindik oryn aýystyrýy jóninde (zeınetke shyǵý, ana bolýǵa baılanysty demalys jáne ózge de) qurylatyn jumys oryndaryna qatysty maqsatty ındıkatorlardy anyqtady. Sonymen qatar, oblystar, Astana men Almaty qalalary ákimderimen birlesken jaǵdaıda, tıisti memorandýmdarǵa qol qoıdyq. Jalpy, elimizde, memleket kómegine júginetin jumyssyz azamattardy eńbekpen qamtýda kádege jaraıtyn qor retinde 630 myńnan astam jumys ornyn qurý kózdelip otyr», - dedi Tamara Dúısenova.
«О́ńirler arasyndaǵy eńbek resýrstarynyń qozǵalysyna erekshe kóńil bólýdemiz. Osy aptada respýblıkamyzda alǵashqylardyń biri bolyp Ońtústik Qazaqstan oblysy 4 óńirden jumys berýshiler usynǵan bos jumys oryndarymen tanysýdyń jáne osylaısha óz mamandyǵy boıynsha tańdaý jasaýdyń tamasha múmkindigin jasady. Bul arqyly, Nátıjeli jumyspen qamtýdy jáne jappaı kásipkerlikti damytý baǵdarlamasyn júzege asyrý aıasynda, qazaqstandyqtarǵa suranysqa ıe kásipke tegin oqyp qana qoımaı, jańadan ashylatyn jumys ornyna, jumys berýshidegi bos orynǵa ornalasýdy nemese jeke is ashýdy tańdaýdy qamtamasyz etemiz. Oblystar arasynda da eńbekke jumylýdy arttyrýdan tys, ónerkásip, aýylsharýashylyq, kólik-logıstıka, saýda jáne qyzmet kórsetý salalarynda jobalardy birlese iske asyrý baǵytynda tyǵyz qarym-qatynas ornatqan jón. Sondyqtan da osy bıznes-forýmdy ótkizý jaıly bastama kóterdik. Úsh kúndik is-sharany joǵary deńgeıde uıymdasytyryp otyrǵan Ońtústik Qazaqstan oblysynyń basshylyǵyna alǵysymdy bildirimen», - dedi T.Dúısenova.
Mınıstr, erikti kóshi-qondy yntalandyrý maqsatynda, el Úkimeti oralmandardy qosqanda qonys aýdarýshylardy qabyldaýda 7 óńirdi (Aqmola, Atyraý, Shyǵys Qazaqstan, Batys Qazaqstan, Qostanaı, Pavlodar jáne Soltústik Qazaqstan) jáne kóshtiń qaınar kózi retindegi 4 óńirdi (Almaty, Jambyl, Mańǵystaý jáne Ońtústik Qazaqstan oblysy) belgilegenin eske saldy. Atalmysh óńirlerden shyǵatyn eńbek mıgranttaryna kósh shyǵyndaryn jabatyn jáne bir jyl boıy baspana jaldaýǵa qajet qarjyny óteıtin sýbsıdııa bólinbek. Barlyq baǵdarlamalarǵa saı beriletin járdemqarjynyń jıyntyq kólemi 18 mln teńgege deıin ulǵaıtylyp otyr. Nesıe 6 paıyzben beriletin bolady.
Forýmda sóz alǵan Soltústik Qazaqstan oblysy ákiminiń orynbasary Asqar Saqypkereev bıylǵy jyly 300 otbasyny qabyldaýǵa daıyn ekendikterin jetkizdi. Ol úshin 600 baspana, 1 myńǵa jýyq jumys orny men 35 myń gektar egistik jer ázirlenip jatqanyna toqtaldy.
Shyǵys Qazaqstan oblysy ákiminiń orynbasary Asem Nýsýpovanyń aıtýynsha, kóship keletin 150 otbasyǵa Reıder jáne Shemonaıha aýdandarynda turǵyn úı beriletin bolady. Jalpy búginde shyǵys óńirinde bos jumys orny 2 myń 105-ke jetip otyr eken.
Bıyl sondaı-aq Qostanaı oblysy ońtústikten qonys aýdaratyn 30 otbasyny qabyldaýǵa nıet bildirip otyr. Al Pavlodar oblysy qonys aýdarýǵa nıetti 100 otbasy úshin 473 bos jumys ornyn usynbaq.
Jıyn sońynda eńbek resýrstaryna suranysty qanaǵattandyrý men eńbek naryǵynyń mobıldiligin arttyrý máseleleri boıynsha Ońtústik Qazaqstan oblysy men Soltústik Qazaqstan oblysy, Qostanaı, Pavlodar, Shyǵys Qazaqstan oblystary ákimdikteri arasynda yntymaqtastyq memorandýmyna qol qoıyldy.
Aıta ketý kerek, mundaı bıznes-forýmdardy aldaǵy ýaqytta Mańǵystaý, Jambyl jáne Almaty oblystarynda ótkizý uıǵarylyp otyr.