Investısııalar jáne damý mınıstrligi men Syrtqy ister mınıstrliginiń bastamasymen alǵash ret uıymdastyrylǵan «Invest in Kostanay» bıznes forýmy elimizge ınvestısııalardy kóptep tartýdy maqsat etedi. «Biz úshin bul – óte jaýapty mindet. Qostanaı oblysynyń jetistikterin dúnıe júzine kórsetýdemiz. Qazaqstanda óndirilip jatqan taýarlardy shet elderge molynan shyǵaryp, qarajatty keńinen tartý qajet. Osyǵan baılanysty Memleket basshysy da úlken mindetter qoıyp otyr», dedi Syrtqy ister mınıstri Qaırat Ábdiraxmanov.
Jıynda aımaq basshysy Arxımed Muxambetov sharaǵa óńirdegi 37 kásiporyn qatysyp otyrǵanyn aıtty. Olardyń 24-i ınvestısııalar tartýdy kózdeıdi. «Qajet qarjynyń jalpy kólemi – 1,5 trln teńgeniń shamasynda. Negizgi sala – aýyl sharýashylyǵy. Budan bólek, mashına jasaý, taý-ken jáne taǵy basqa salalar bar. Biz jylyna astyqtyń 2 mln tonnasyn eksportqa shyǵara alamyz. Byltyr dıirmenimizden ótken 1,1 mln tonna unymyzdyń 80 paıyzyn syrtqa tasymaldadyq. Bul oblystyń eksportty arttyrýǵa múmkindigi mol ekenin ańǵartady», dedi oblys ákimi.
Búginde oblysta shyǵarylatyn taýarlardy Iran, Saýd Arabııasy men Qytaıǵa jetkizý máselesi qaralýda. Budan bólek, Qostanaı oblysy Reseımen shekaralas aýdandarmen ózara saýda-sattyqty ulǵaıtýdy kózdeıdi.
Aımaq ákiminiń aıtýynsha, aǵymdaǵy jyly óńirde jolaýshylar avtobýsynyń taǵy bir markasy qurastyrylmaq. «Bıyl biz EKSPO-2017 halyqaralyq kórmesine qoǵamdyq kólikter jetkizetin bolamyz. «Astana LRT» kompanııasymen rásimdelgen kelisimshartqa sáıkes, 400-ge jýyq avtobýsymyz elordalyqtar men qonaqtaryna qyzmet etedi. Olardyń 75 paıyzynyń syıymdylyǵy júzden astam jolaýshyǵa laıyqtalady. Kólikter kórme kezinde týrısterdi tasymaldasa, odan keıin Astananyń qoǵamdyq kólikter parkin tolyqtyrady», dedi A.Muxambetov. Qazirgi tańda Qostanaı oblysynda jolaýshylar kóliginiń 40 modeli, kommersııalyq tehnıkanyń 10 modeli shyǵarylady. Onda Eýropanyń jetekshi elderiniń, Ońtústik Koreıa men Qytaı óndirisi qamtylǵan. Bul salada 1100 maman jumys isteıdi. Sonymen qatar «JAC» elektromobıliniń óndirisin damytyp, avtomobıl qurastyrýdy jetildirý maqsatynda Indýstrııalyq aımaq salynýda. Onda avtokomponentter shyǵaratyn birneshe zaýyt ornalasady. Qazirgi tańda jelileri tartylyp jatqan aımaqtyń bıyl birinshi bóligi, kelesi jyly ekinshi bóligi paıdalanýǵa berilmek.
«Oblys kásiporyndary elektromobıl, gıbrıd, gazben júretin mashına sııaqty jańa tehnologııaǵa mán berýde. Mysaly, Qostanaı avtozaýyty «JAC» elektromobıliniń 12 danasyn shyǵardy. Olar EKSPO-2017 kórmesine usynylady. Aǵymdaǵy jyldan bastap «EURO 5 EXPO» ekologııalyq talaptaryna saı keletin «Ankai» jolaýshylar avtobýsynyń serııalyq óndirisin de iske qospaqpyz. Sondaı-aq, О́zbekstannyń «ÝzAvto» kásipornymen yntymaqtasyp, jeńil jáne júk avtomobılderin qurastyramyz», dedi oblys ákimi.
Aımaq basshysy mańyzdy kórmege 100 myń qostanaılyq keletinin tilge tıek etip, óńir kásipkerleri 34 myń tonna azyq-túlik ónimin ákeletinin de málimdedi.
Ashat RAIQUL,
«Egemen Qazaqstan»