Quryltaıda Qazaq PEN-klýbynyń prezıdenti Bıgeldi Ǵabdýllın uıymnyń ótken jylǵy jumysy týraly esep berdi. Ásirese, shetelde ádebı aýdarmany uıymdastyrý oraıynda birshama ilkimdi ister atqarylǵan eken. Bul jumysqa alǵash ret amerıkalyq jáne aǵylshyndyq kásibı tárjimashylar tartylypty.
Sóıtip, Qazaq PEN-klýbynyń tapsyrysy boıynsha Nıý-Iorktegi Metropolıten Klassık baspasynan ótken jyly Oljas Súleımenovtiń «Sóz kilti», Smaǵul Elýbaevtyń «Aq boz úıi», Ábish Kekilbaevtyń «Ańyzdyń aqyry» kitaptary aǵylshyn tiline aýdarylyp, jaryq kórgen. Bul ıgilikti iske Katrın Fıtspatrık, Marına Vladı, Ihar Kozak syndy bilikti tárjimashylar bilek sybana kirisip, óz úlesterin qosqandyǵy da nazardan tys qalmady.
Bir aıtarlyǵy, osynaý árbir kitap tanystyrylym úshin kádesyılyq sıpatta 300 danadan basylyp, sondaı-aq ınternet-alańda ornalastyrylǵan. Sóıtip, bul arada kitapty Amazon, Barnes&Noble, Ingram arqyly álemniń kez kelgen túkpirinen satyp alýǵa bolady. Kitaptar tapsyrys berýshiniń qalaýy boıynsha, jumsaq muqabaly nusqada da, sondaı-aq elektrondy pishimde de jiberile beredi. Tanystyrylymdyq danalar AQSh-tyń iri kitaphanalaryna, elimizdiń mádenıeti men tili oqytylatyn ýnıversıtetter men kolledjderge, ortalyq baspalarǵa, AQSh-taǵy Qazaqstan elshiligine jáne Qazaqstan Respýblıkasynyń BUU-daǵy ókildigine taratylyp berilgeni de quba-qup.
Atalmysh kitaptar 2016 jyldyń qyrkúıek-qazan aılarynda Galısııada (Ispanııa) halyqaralyq PEN otyrystarynda jáne Frankfýrttegi kitap jármeńkesinde tanystyrylyp, talǵampaz qaýymǵa kózaıym etilgen bolatyn. Alǵashqy pikirlerden-aq bul kitaptardyń álem oqyrmanyna unaı bastaǵanyn baıqaǵandaımyz. Baspa resenzentiniń O.Súleımenovtiń kitabyna bergen baǵasy barshamyzǵa mereı. Al «Ańyzdyń aqyry» romany týraly amerıkalyq synshynyń ǵajap pikirin Ábish aǵanyń estı almaı ketkeni qandaı ókinishti deseńizshi!
Internet-portal arqyly kitap satý bastalyp ta ketipti. Osy rette ótken jyldyń qarashasynda Smaǵul Elýbaevtyń kitaby Amazonda «Apta kitaby» dep tanylýy qazaq jazýshylarynyń muhıttyń ar jaǵyndaǵy áleýetin aıqyn ańdatqandaı.
Sondaı-aq, 2016 jyly orys jáne qazaq tilderinde jas qazaqstandyq prozashylardyń qos tomdyǵy shyǵarylǵan. Qazaq PEN-klýbynyń delegasııasy birqatar halyqaralyq is-sharalarǵa qatysqan.
Quryltaıda Farhat Tamendarov pen Nurtóre Júsip Qazaq PEN-klýbynyń vıse-prezıdentteri bolyp saılandy. Sonymen qatar, kanadalyq Mosaic Press baspasymen kelisimge qol qoıylǵandyǵy jarııa etildi. Sóıtip, «Biz – qazaqtar...» serııasymen kitap shyǵarý jónindegi jumys jalǵasyn tappaq. Bul joba aıasynda otandyq avtorlardyń tańdaýly shyǵarmalary aǵylshyn tiline aýdarylyp, AQSh pen Ulybrıtanııada jaryq kórmek. Osy oraıda sońǵy tusaýy kesilgen kitaptardyń biri Gerold Belgerdiń tańdamalysy ekendigin aıtqan lázim.
Qorǵanbek AMANJOL,
«Egemen Qazaqstan»