Elordadaǵy Ulttyq akademııalyq kitaphananyń «Shańyraq» zalynda atalmysh romannyń qazaq tiline aýdarylǵan nusqasy oqyrmanǵa tanystyrylyp, tusaýy kesildi. Oǵan Gete ınstıtýtynyń ókilderi jáne aýdarmashylar qatysty.
Sharada sóz alǵan Ulttyq akademııalyq kitaphananyń dırektory Úmithan Muńalbaeva: «Árbir balaǵa áje kerek. О́zim de búgingi tańda ájemin. Áje bolý baqytyn seziný jaqsy kóńil-kúı syılaıdy. Kitaphananyń baılyǵy – kitapta. Mynadaı jaqsy bastamaǵa alǵys aıtamyn», dedi.
Al óz kezeginde kitap avtory Anıa Týkkerman kitap jazý da, jazylǵan shyǵarmany ózge tilge aýdarý da ońaı emestigine mán berdi. Onyń oıynsha, kitap sátti aýdarylǵan. Soǵan rahmet aıtyp, oqyrmandarymen júzdeskenine qýanyshty ekenin jetkizdi.
Roman kún uzaq urpaq qamy úshin jantalasyp, biraq solarǵa qaraýǵa ýaqyty joq ata-analardyń tirshiligin sıpattaıdy. Basty keıipker Shtefıdiń anasynan basqa jaqyny joq. Biraq sol anasynyń ózi de tek demalys kúnderi bolmasa, Shtefıdiń janynda bola bermeıdi. Úıde otyra berýden ishi pysqan kishkentaı bala ózine áje izdeıdi. Jáne birnesheýin taýyp alady. Olar da osyndaı súıkimdi nemereli bolýdy qalaıtyn jandar bolyp shyǵady...
Shara barysynda L.N.Gýmılev atyndaǵy Eýrazııa ulttyq ýnıversıtetiniń oqytýshysy Nursulý Shaımerdenova men belgili jazýshy, «Daryn» memlekettik syılyǵynyń laýreaty Aıgúl Kemelbaeva sóz alyp, shyǵarmanyń ereksheligine, mańyzdylyǵyna, aýdarmasynyń sapasyna qatysty pikir bildirdi.
Oqyrmanǵa usynylyp otyrǵan «Maǵan áje kerek» («Suche Oma») – romany Anıa Týkkermannyń keń taraǵan shyǵarmalarynyń biri. Avtordyń osy ýaqytqa deıin 21 kitaby jaryq kórgen. Kitaptarynyń kópshiligi álemniń 30 tiline aýdarylǵan. «Maǵan áje kerek» aýdarmashy Tańsulý Rahymbaevanyń tárjimalaýymen «Atamura» baspasynan jaryq kórdi.
Aıgúl SEIILOVA,
«Egemen Qazaqstan»