Úkimet basshysynyń orynbasary – Aýyl sharýashylyǵy mınıstri Asqar Myrzahmetov agrarlyq salany memlekettik qoldaý baǵytynda atqarylǵan jumystarǵa toqtaldy. Naqty aıtqanda, baǵdarlama aıasynda 8 baǵyttaǵy sýbsıdııalaý erejeleri qaıta qaralǵan. Sondaı-aq, sýbsıdııanyń on bir túri alynyp, 39 sýbsıdııa túrine ózgeris engizilgen.
– Bıyldan bastap memlekettik qoldaýǵa qol jetkizýshilerdiń qatary 7,5 esege ósedi. Bul baǵdarlama tetikterin júzege asyrýǵa engizilgen birneshe ózgeristerden keıin júzege asyp otyr, – dedi A.Myrzahmetov.
Qarjylandyrýdyń naqtylanýy aımaqtardaǵy mal bordaqylaý alańdarynyń sanyn úsh esege deıin kóbeıtýge jol ashpaq. Bul óz kezeginde eldegi sharýalardyń qolyndaǵy asyl tuqymdy mal basynyń kóbeıýine yqpal etedi. Al kooperasııa múshelerine qarastyrylǵan jeńildikter aýyldyń gúldenýine jol ashatyn qadam retinde baǵalanýda. «Kooperasııaǵa satylatyn 1 bas iri qara úshin memleket qaıtarymsyz 20 myń teńge taǵy tólemek. Sondaı-aq, 1 lıtr sútke 10 teńge, bir bas ýaq malǵa 1500 teńge qosymsha qarjy bólinedi. Budan bólek kooperasııaǵa alynatyn jemniń ár tonnasyna 20 myń teńge tóleý kózdelgen. Alaıda, bul kooperasııaǵa birikpegender memlekettik qoldaýdan tys qalady degen sóz emes. Qoradaǵy maly 30 bas iri qaradan asatyn sharýa saýylǵan ár lıtr sútke 15 teńgeden, al 400 bastan joǵary maly bar sharýa súttiń ár lıtrin 25 teńgeden sýbsıdııalaýǵa qol jetkizedi», dedi mınıstr.
Asyl tuqymdy eshki asyraýshylar birinshi ret memlekettik qoldaýǵa ıe bolmaqshy. Dál osyndaı múmkindik balyq sharýashylyǵy úshin de týyp otyr. Taýarly balyq ósirýshilerge tuńǵysh ret sýbsıdııa tólenedi. Tipti, balyqtyń uryǵy, tamaǵy, ony qadaǵalaıtyn tehnıkalaryna deıin ınvestısııalyq sýbsıdııa qarastyrylǵan. Iаǵnı, bıyldan bastap kooperatıvke birikken ujym qajetti tehnıka satyp alar bolsa, ketken shyǵynnyń 50 paıyzyn memleket birden ótep bermek.
Sýbsıdııalaýǵa qatysty taǵy bir jańalyq – qarjylandyrý tetikteriniń avtomattandyrylýy. Bul sybaılas jemqorlyqtyń aldyn alý maqsatynda jasalǵan qadam. Keler jyldan bastap aýyl sharýashylyǵy salasyn qoldaýǵa bólinetin qarjy kózderi elektrondy tapsyrys berý júıesine kóshetin bolady.
«Aýyl sharýashylyǵyn damytýdyń 2017-2021 jyldarǵa arnalǵan baǵdarlamasyn» engizý barysynda kóptegen qujattarǵa túzetýler jasalǵan. Normatıvtik aktiler ońtaılandyrylyp, 11 kodeks pen 25 zań tarmaǵy ózgerip, tolyqtyryldy.
Jalpy, bul ózgertýlerdiń aýyldaǵy sharýaǵa sharapaty tıip, jumystyń jeńilderi sózsiz.
Qalmahanbet MUQAMETQALI,
«Egemen Qazaqstan»