Sodan beri bas kıimin ǵana emes, bar kıimin qadirlep, kez kelgen adamnyń basyn baǵalaýdy ómir saltyna aınaldyrdy» dep jazady. Bas kıim týraly bekerge aıtyp otyrǵan joqpyz. Semeıde Ámire Qashaýbaev atyndaǵy oblystyq fılarmonııa bar. Osy óner ordasynyń dırektory Adaı Azamatov qashan kórseńiz de, basynan bıikteý kelgen, tóbesinde baýy bar qara tústi bas kıimdi tastamaıdy. Oǵan jurttyń kózi de úırenip ketkendeı. Jýyqta bir kezdeskende aǵamyzdan erekshe úlgidegi bas kıimi týraly syr sýyrtpaqtadym. Sóıtsem, munyń ózindik qyzyq tarıhy bar eken.
– Bul bas kıimniń aty fesko dep atalady. Muny kezinde Ahmet Baıtursynov syndy alashtyń ardaqtylary da kıgen. Buǵan qumartýymnyń ózindik syry bar. Toqsan ekinshi jyly Almatyda belgili ánshi, sazger Tursynǵazy Rahımovtyń shyǵarmashylyq keshin ótkizýge muryndyq boldym. Keshke Almatydaǵy qazaqtyń ónersúıer zııaly qaýym ókilderi túgeldeı jınaldy. Olardyń arasynda qazaqtyń tuńǵysh kásibı rejısseri Asqar Toqpanov ta bar edi. Sol kezdesýde Asqar aǵanyń basyndaǵy feskosyna qatty qyzyqtym. Ruqsat surap, kıip te kórdim. Meniń basymdaǵy feskosyn kórip: «Sizge óte jarasady eken» dedi súısinip, artynsha: «Poka ıa jıvoı, ıa tebe ne razreshaıý», dedi orysshalap. Betke týra aıtatyn, tik minezdi adam edi ǵoı. Asqar aǵa qaıtys bolǵannan keıin alty aıdan soń osy bas kıimniń úlgisin taýyp, arnaıy tapsyryspen tiktirdim. Sodan beri bul feskony basymnan tastamaımyn. Semeıde muny menen basqa eshkim kımeıdi. Sońǵy jyldary uly Abaı atamyzdyń jıeni Baltash Ersálimov aqsaqal kıip júr. Biraq ol kisiniki budan tómen. Áýelde fesko kıgenimdi qasymdaǵy jora-joldastarym, tanystarym qyzyq kóretin. Tipti, «tatar kele jatyr», «Adaı ápendi kele jatyr» deýshiler de boldy. Qazir kózderi úırendi, – deıdi Adaı Azamatov.
Azamat QASYM,
«Egemen Qazaqstan»
Shyǵys Qazaqstan oblysy