«Jańǵyrý ataýly burynǵydaı tarıhı tájirıbe men ulttyq dástúrlerge shekeden qaramaýǵa tıis. Kerisinshe, zaman syrynan súrinbeı ótken ozyq dástúrlerdi tabysty jańǵyrýdyń alǵysharttaryna aınaldyra bilý qajet. Eger jańǵyrý eldiń ulttyq-rýhanı tamyrynan nár ala almasa, ol adasýǵa bastaıdy», delingen onda.
Ulttyq rýhanı-tamyr... Baǵanaly báıterektiń butaǵyn jel shaıqap, daýyl terbetken talaı. Zamanalar jeli, ǵasyrlar daýyly.
Sol tamyry tereń báıterek sonaý kóshpendiler órkenıetinen aman jetip XXI ǵasyrdyń bastaýynan nár alyp kúnge qarap japyraǵyn jaıyp tur. Bul kezeń – jer-jahańda aqyl-oıdyń alamanǵa túsken ýaqyty.
«Jańa turpatty jańǵyrýdyń eń basty sharty – sol ulttyq kodyńdy saqtaı bilý. Onsyz jańǵyrý degenińiz qur jańǵyryqqa aınalýy op-ońaı», delingen Elbasymyzdyń osy eńbeginde. Túıtkildi shesher túıindi oı osy. Ulttyń bolmysyn, eldiń tutastyǵyn saqtaý – sizge de, bizge de syn. Shyndyq izdegen bop shyǵanǵa shyqpaı, «Janym – arymnyń sadaǵasy» deıtin qazaqı qaǵıdanyń aýylynan alys qonbasaq qudaı tileýimizdi berer.
Osy oı tolǵaýdyń úshinshi bóligi «Ulttyq biregeılikti saqtaý» dep atalypty. Onda: «Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis», delingen.
Osy sanattaǵy «Qazaqstandaǵy 100 jańa esim» ıdeıasy, «Týǵan jer» baǵdarlamasy el men jerdiń erteńin oılaǵan arnaly tolǵanystardyń jemisi. Jaqsylyqtar men ıgilikter jarııa bolýǵa tıis. Jaqsy adamdar, jomart júrekti jandar janymyzda júr. Búgingi kúnniń keıipkerlerin nasıhattaý, búgingi kúnniń bútin sózin aıtý – mindettiń úlkeni.
Jaqynda «Qazaqstan» telearnasynyń «Aıtýǵa ońaı» baǵdarlamasyna qonaq etip shaqyrdy. Týǵan jerine kómegi tıgen azamattar jóninde habar eken. Solardyń ishinde meniń aýyldasym, sonaý Jańaarqanyń «Jeńis» aýylynan kelgen Qaırat Kópbaev degen ini-baýyrymdy kórip, qýanyp qaldym. Jeke qojalyq ıesi, jylqyshy Qaırat aýylǵa sport keshenin salypty. Onyń quny 110 mıllıon teńge eken. Tusaýkeserin jasap, aýyl ákimine ótkizip beripti. «Odan saǵan túser ne paıda bar?» – degen telejúrgizýshi suraǵyna: «Aýyldyń balalaryna kerek emes pe?» – dep kúlim qaǵady Qaırat baýyrym. Mine, «Týǵan jer» ıdeıasynyń qoldaýshysy, mine, búgingi kúnniń keıipkeri.
«Gúlstan» jýrnalynyń redaktory, belgili kásipker Gózel Quljabaeva qaryndasymyzben kópten aralasyp turamyn. О́z aýyly «Basshı», «Nurym» degen eldi mekenderden birneshe baq ornatqan, gúlge bólegen. Qazaqstanda onyń kásibinen úlgi alyp júrgender de kóp. Armany – qazaqtyń jerin gúlge kómkerý, baqqa oraý.
Keshegi Buqar jyraý babamyz: «Bárińiz bir eneden týǵandaı bolyńyz: jat janynan túńilsin, aınala almaı at ólsin, aıyra almaı jat ólsin», – dep beker ósıet aıtyp ketti deısiz be?
«Bolashaqqa baǵdar: rýhanı jańǵyrý» sara da dara joldyń bastaýynda el Kóshbasshysynyń úkili úmiti, aıaly armany.
«Kemedeginiń jany bir» deıdi qazaq. Ulttyń kodyn saqtaý degen sóz – ultty saqtaý degen sóz. Eki dáýir men eki ǵasyr toǵysynda jańǵyrýdyń jańa baǵytyn Elbasy ózi usynyp otyr.
Meniń de, seniń de Otanyń – Qazaqstan, baýyrym! Odan basqa túgimiz de joq.
Barymyz da, baǵymyz da, baqytymyz da – Qazaqstan!
Bolashaqtyń baǵdary barshamyzdyń armanymyzdy aıalasyn.
Ǵalym JAILYBAI,
aqyn, Qazaqstannyń eńbek sińirgen qaıratkeri, Qazaqstan Jazýshylar odaǵy Basqarma
tóraǵasynyń birinshi orynbasary