Jıynda Elbasynyń tikeleı tapsyrmasymen 2012 jyly qurylǵan basqarmanyń atqarǵan jumystary aıtylyp, jastardyń áleýetin júzege asyrý úshin jasalyp jatqan jańa múmkindikter jaıly sóz qozǵaldy.
Búgingi kúnde Qaraǵandy oblysynda 14-28 jastaǵy 304 269 jas turady eken. Bul – oblys halqy sanynyń 22 paıyzyn quraıdy degen sóz. Qazirgi tańda oblysta jastardyń 19 resýrstyq ortalyǵy qyzmet atqarady. Qaraǵandy oblysynyń jastar saıasaty máseleleri jónindegi basqarmasynyń basshysy Mıras Quttybaıdyń aıtýynsha, «Jasyl el», «Dıplommen – aýylǵa!», «Jastar tájirıbesi», «Serpin-2050» jobalary tabysty júzege asýda. Jastar resýrstyq ortalyǵy janynda balalar úıiniń túlekteri úshin áleýmettik beıimdeý qyzmeti jumys isteıdi. Osy baǵytta 753 quqyqtyq jáne 159 psıhologııalyq keńester qyzmeti kórsetilip, 58 trenıng ótken. Qaraǵandy, Temirtaý qalalaryndaǵy balalar úılerinde 27 ret kezdesý uıymdastyrylyp, 700 adamnyń qatysýymen 150 sabaq ótkizilgen. Buqar jyraý aýdanynyń Kerneı kentindegi mektep-ınternatta «О́mir mektebi», «Tabysqa jeter jol» jobalary jumys isteýde.
Balalar úıleri tárbıelenýshileriniń bos ýaqyttaryn uıymdastyrý jáne qylmystyń aldyn alý jumystaryna 986 adam jumyldyrylǵan. Jastardy jumyspen qamtý júıeli túrde qolǵa alynǵan. Atap aıtqanda, «Jumyspen qamtýdyń jol kartasy-2020» baǵdarlamasy aıasynda, «Jastar tájirıbesi» jobasy arqyly oblys boıynsha 1204 jas jumysqa ornalasqan. Olardyń ortasha eńbekaqysy 51 myń 264 teńgeni quraǵan. Sonymen qosa, jumyssyz jastarǵa jármeńke uıymdastyrylypty. Nátıje joq emes. Kásipkerlikke bet burǵan jastardyń sany artqan. Jyl saıyn aýyldyq jerlerdegi jas kásipkerlerge oblys ákiminiń granty tabystalyp keledi. 2005-2016 jyldar aralyǵynda 30 mln teńge grant berilip, Aqtoǵaı, Buqar jyraý, Shet, Osakarov aýdandarynda jas azamattar óz kásibin ashqan.
Turǵyn úımen qamtamasyz etý maqsatynda birqatar sharýa atqarylǵan. Bıylǵy jyly Qaraǵandy qalasyndaǵy Belınskıı kóshesinde 108 páterlik úı, Qarqaralyda 12 jaldamaly páter, jalpy alǵanda, 144 arendalyq turǵyn úı paıdalanýǵa berilgen. 2014-2016 jyldarǵa arnalǵan jetim jáne ata-ananyń qamqorlyǵynsyz qalǵan balalardy turǵyn úımen qamtý boıynsha keshendi jospar jasalyp, 316 páter bólingen.
Jalpy, jastar saıasatyn iske asyrý úshin bıylǵy jyly oblys boıynsha 88 mln teńgeden astam qarjy qarastyrylǵan.
Mıras ASAN,
«Egemen Qazaqstan»
Qaraǵandy oblysy