Atajurtynan ketýge májbúr bolyp, ondaǵan jyldardan soń Aýǵanstannan týǵan jerine qaıta oralǵan qandastarymyz týraly fılm Sh.Aımanov atyndaǵy «Qazaqfılm» AQ «Qadam» kınokompanııasynyń qatysýymen Mádenıet jáne sport mınıstrliginiń tapsyrysy boıynsha túsirilgen. Fılmde Dýlyǵa Aqmolda, Esim Segizbaev, Erjan Túsipov, Shynar Asqarova, Baıan Qajynabıeva sııaqty tanymal akterler oınaıdy.
Bıyl kınofestıvaldiń «Shyǵys shyraıy» seksııasyna 12 elden 15 tolyqmetrajdy kartına usynylǵan. Aıta keteıik, Fadjr kınofestıvaliniń «Shyǵys shyraıy» baǵdarlamasynyń qazylar alqasynyń quramynda qazaqstandyq tanymal rejısser Dárejan О́mirbaev ta bar.
Rejısser Sábıt Qurmanbekov fılm jaıly óz oıyn bildire kele, kórkem týyndydaǵy oralman beınesi týraly: «Bul festıvalden jeńis kútpeımin. О́ıtkeni, maǵan jeńis emes, sol jaqtaǵy qandastarymyzdyń osy fılmdi kórgeni mańyzdy. Fılmim arqyly jalpyadamzattyq taqyrypty kótergim keldi».
S.Qurmanbekovtiń aıtýynsha, kınotýyndy HH ǵasyrdyń 30-jyldary qyzyl ásker jendetteriniń zorlyq-zombylyǵynan qashyp, Aýǵanstanǵa qonys aýdarýǵa májbúr bolǵan qazaq otbasy týraly. Bas keıipker Bazarbaı qarttyń qyzy men uly sol jaqta dúnıege keledi. Balalary eseıip, otbasyn qurady. Uly Saparqul jergilikti pýshtýn ultynan kelinshek alady. Al qyzy aýǵan jigitine turmysqa shyǵady. Saparqul soǵys kezinde modjahetter jaǵynda soǵysady. Jyldar ótedi. Bazarbaıdyń otbasy Qazaqstanǵa kóshýge ruqsat beretin kvota alady. Barlyǵy jolǵa jınalady. Taýly qyshlaqtan shyqqan otbasyny uzaq jol kútedi...
Aıgúl AHANBAIQYZY,
«Egemen Qazaqstan»
ALMATY