− Eski sýretter bolsa, olardy óńdep, kóbeıtip, úlkeıtip, portret jasatamyz. Astyna maıdangerdiń aty-jónin, týǵan, qaza tapqan jylyn kórsetemiz. Osyǵan ketken qarjynyń barlyǵyn partııa fılıaly ózi kóteredi, − deıdi «Nur Otan» partııasynyń oblystyq fılıaly saıası jumystar bóliminiń meńgerýshisi Oljas Dúısekov.
Qostanaılyqtar tek ómirden ótken atalarynyń ǵana emes, qazir aramyzda seleýdeı seldirep, syrtqa shyǵa almaı úıde otyryp qalǵan soǵys ardagerleriniń de sýretterin ákeledi. Qart maıdanger ózin áli qatarda sanaıdy, sherýge shyqqysy, máńgilik alaý qasynda Jeńis kúnine jete almaǵan qandy kóılek dostarynyń rýhyna bas ıip, gúl shoqtaryn qoıǵysy keledi. Sondyqtan olardyń portretterin merekelik sherý kezinde partııa fılıalynyń volonterleri nemese áleýmettik qyzmetkerler ustap shyǵatyn bolady.
Jyl saıyn aksııa jańalyqtarmen, qyzyqty istermen tolyǵyp keledi.
− Osydan eki jyl buryn birneshe adam bir ardagerdiń sýretin ákeldi. Sóıtsek, soǵysta qaza tapqan bozdaq álgi kisilerdiń barlyǵyna ortaq týys eken, olar bir qalada turyp, birin-biri bilmegen. Olar aksııa arqyly týystaryn taýyp, arqa-jarqa boldy. Al bıyl bir ájeı soǵystan qaıtpaǵan, habarsyz ketken aǵasynyń hatyn ákeldi. Kómek surady. Biz áskerı komıssarıattar, arhıvter arqyly ájeıdiń aǵasynyń Batys Eýropada jerlengenin anyqtadyq, − deıdi Oljas Dúısekov.
Qostanaılyq nurotandyqtar aksııa bastalǵaly beri bir myńnan asa soǵys ardageriniń portretterin jasapty. Jeńis kúni merekelik sherýge qarttar, jastar – barlyǵy qatysady. Bireý ákesiniń, bireý aǵasynyń, naǵashysynyń, atasynyń, babasynyń portretterin alyp shyǵady. Jeńis týynyń jelbiregenine 70 jyldan assa da, erlikke taǵzym eskirgen joq, atalar rýhy asqaqtap, týǵan elge, týǵan jerge degen perzenttik sezim ár júrekti atsha týlatady. Qostanaılyqtar Jeńis kúnin qasıettep, qadirlep qarsy alady.
Názıra JÁRIMBETOVA,
«Egemen Qazaqstan»
QOSTANAI