Taqyrypqa qatysty arnaıy baıandamany Sh.Shaıahmetov atyndaǵy tilderdi damytýdyń úılestirý-ádistemelik ortalyǵynyń dırektory Erbol Tileshov jasady. Ol Tilderdi damytý jáne qoǵamdyq-saıası jumys komıtetiniń memlekettik tapsyrysymen ótken jyly iske qosylǵan «Til álemi» portaly men «Emle.kz», «Termincom.kz», «Atau.kz» syndy saıttardyń búgingi qyzmeti men tehnıkalyq jetildirý jaıy, qoǵamǵa tıgizip jatqan paıdasy týraly aıtyp, áleýmettiń pikirin áńgimege arqaý etti.
Sondaı-aq, talqylaý barysynda sóz alǵandar latyn álipbıine kóshý jaıyn qozǵaǵanda, máseleni asyra saıasılandyrýdyń qajet emestigin túsinýge shaqyrdy. Sonymen qatar, álipbı aýystyrý áreketinde alys-jaqyn kórshi elderdiń tájirıbesi de muqııat zerttelip, zerdelený qajettigi atap kórsetildi.
«Bárine ýaqyt tóreshi. О́zbekstan men Túrikmenstan, Ázerbaıjan elderiniń júrip ótken jolyn saralaý biz úshin óte mańyzdy. Máselen, latynǵa kóshken ózbek aǵaıyndar 24 jyl ishinde nelikten 3 ret reforma júrgizýge májbúr boldy. Osyndaı jaǵdaılar bizdi tereń oılanýǵa jeteleıdi», – dedi S.Abdrahmanov.
Baıandamashy tanystyrǵan saıttar oqyrmandar ıgiligine aınalyp otyrǵanyn atap ótken depýtat Anar Jaıylǵanova baıandamashy tanystyrǵan jobalar, ásirese, sheteldegi qazaqtar úshin qolaıly bolatynyn tilge tıek etti. «Ásirese, qazaq tiliniń qurylymy men qundylyǵyn tanyp, bilýde shetel qazaqtary «Emle.kz» saıtyn keńinen paıdalanyp otyr eken. Mundaı jobalar Elbasynyń kúni keshe ǵana jarııalaǵan maqalasyn tushynyp oqý úshin de orasan zor múmkindikter berýde», – dedi ol.
Sonymen qatar, álipbı aýystyrý máselesinde erterekte qoldanysta bolǵan latyn tańbasyna negizdelip jasalǵan álipbılerimiz de nazardan tys qalmasa degen tilekter aıtyldy. Atap aıtqanda, depýtat Shaımardan Nurymov qoldanysta bolmasa da, osy kezge deıin qurastyrylǵan álipbılerdiń bir-eki tańbasynan ózgesi máseleni esh kúrdelendirmeıtindigine toqtaldy.
Otyrys sońyna qaraı qatysýshylar usynys, pikirlerin bildire kelip, Memleket basshysy atap kórsetken latyn álipbıine kóshýdi tolyq qoldaıtynyn atap ótti. Igiligi mol mundaı bastamaǵa qoǵamdy jappaı jumyldyryp, túrli ult pen ulystyń ókilderin utymdy iske uıytýda Qazaqstan halqy Assambleıasynyń baǵyt-baǵdarlary naqtylandy.
Nurlybek DOSYBAI,
«Egemen Qazaqstan»