Konferensııaǵa Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa músheleri, ortalyq jáne jergilikti atqarýshy memlekettik organdardyń, úkimettik emes jáne halyqaralyq uıymdardyń, dinı birlestikterdiń ókilderi, stýdent jastar men sarapshylar qatysty.
Memlekettik hatshy Elbasynyń «Qazaqstannyń úshinshi jańǵyrýy: jahandyq básekege qabilettilik» atty halyqqa joldaýynda dinı ekstremızmdi nasıhattaýdyń aldyn alý jóninde jumys júrgizý qajettigi týraly mindetter qoıǵanyn jáne bul jumystarǵa úkimettik emes sektor men dinı birlestikterdi belsendi atsalysýǵa shaqyrǵanyn atap ótti.
Búginde Qazaqstandaǵy jastardyń sany 4 mln. Din isteri jáne azamattyq qoǵam mınıstrliginiń málimeti boıynsha, qazir jastardyń 79,6%-y dinı kózqarasty jaqtaıdy. Olardyń arasyndaǵy dindi belsendi ustanýshylar úlesi – 9,9%.
2013 jyldan bastap Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa din isteri jónindegi ókiletti organmen birlesip, elimizdiń 10 óńirinde «Áıel jáne din» atty jobany júzege asyryp keledi.
Memlekettik hatshy jahandanyp kele jatqan álemde syn-qaterler údep turǵan qazirgideı kezeńde zaıyrly Qazaqstannyń basty mindeti dinı ekstremızmmen kúres salasyndaǵy syndarly ári tıimdi memlekettik saıasat júrgizý bolyp sanalatynyn atap ótti.
Dindar adamdardyń radıkaldanýyna yqpal etetin negizgi aqparat kózi ınternet bolyp otyr. Bıylǵy birinshi toqsanda qazaqstandyq ınternet keńistikte terrorızm jáne ekstremızm ıdeıalaryn taratý baǵytyndaǵy 100 myńnan astam derek anyqtalyp, olardy joıý sharalary júrgizildi. Quqyq qorǵaý organdarynyń júıeli jumysy arqasynda byltyrǵy 6 aı ishinde ekstremızm jáne terrorızm nyshany bar 315 qylmys tirkelgen. 12 ekstremıstik aktiniń joly kesildi. Memleket tarapynan halyqtyń túrli toptarynyń arasynda maqsatty túrde aldyn alý jumystary júıeli júrgizilýde. Dástúrli emes dinı baǵytty ustanýshylardyń 32%-y arnaýly saýyqtyrý sharalarymen qamtyldy.
Dinı ekstremızm men terrorızmge qarsy Qazaqstan Respýblıkasyndaǵy is-qımyldyń 2013-2017 jyldarǵa arnalǵan memlekettik baǵdarlamasynyń júzege asýy arqasynda el turǵyndarynyń shamamen 90%-yn qamtyǵan túsindirý jáne aldyn alý jumystary júrgizildi. Sálafıılik aǵymnyń 70-ke jýyq jetekshisi men belsendisiniń Qazaqstan qoǵamynyń qundylyqtaryna degen kózqarasyndaǵy qatelikterdi túzetip, dástúrli túsinikke oralýyna jaǵdaı jasaldy. Shetelge ótip ketip, terrorıstermen birge áskerı is-qımyldarǵa qatyspaq bolǵan 91 qazaqstandyqtyń jolyna tosqaýyl qoıyldy. Terrorıstik jáne dinı-ekstremıstik sıpaty bar qylmysy úshin 123 adam sottalyp, jazasyn óteýde.
Gúlshara Ábdiqalyqova jastar men áıelderdiń boıynda dinı ekstremıstik uıymdardyń nasıhattaryna qarsy turatyn berik ımmýnıtet qalyptastyrý qajettigi qazirgi mańyzdy mindet bolyp sanalatynyn atap ótti.
Is-shara sońynda Memlekettik hatshy áıelder men jastar arasyndaǵy dinı ekstremızmge qarsy is-qımyl jónindegi birqatar naqty mindetterdi belgilep berdi.