Almatyda osymen 6-shy ret ótkizilip otyrǵan qaıyrymdylyq marafonyna qatysýshylar sany burynǵydan tipti de arta túsken. Qatysýshylardyń basym bóligi kásibı sportshylar emes, kópshiligi marafonǵa qyzyǵýshylyǵy bar, óziniń denesin shynyqtyrý úshin qatysatyndar.
Marafonnyń ashylýynda Almaty qalasynyń ákimi Baýyrjan Baıbek pen velosporttan Olımpıada chempıony Aleksandr Vınokýrov qatynasyp, bul marafonnyń buqaralyq sportty damytýda mańyzy zor ekenin atap ótti. Qatysýshylar arasynda óner, sport juldyzdary da bar. Marafon bastalar aldynda túrli kompanııalar, fırmalar, ýnıversıtetter, qoǵamdyq birlestikter ózderiniń aksııalaryn ótkizip, komandalaryn tanystyrdy. Almatylyq JOO stýdentteri Ekıden-komandalyq marafonyna tirkeldi.
Bıyl marafonǵa álemniń 38 elinen 13 000-nan astam adam jazylypty. Osylaısha ıgi dástúrge aınalǵan bul marafonnyń aýqymy jyl sanap keńeıip keledi.