Al, bıylǵy Azııa chempıonatynyń «Azııa» degen ataýy bolmasa, quddy bir О́zbekstan chempıonatyn tamashalaǵandaı boldyq. Fınalǵa shyqqan 9 ózbek boksshysy Azııanyń altynyn alyp, medal sany boıynsha Azııa chempıonatynyń rekordyn jańartty. (Buǵan deıin 1987 jyly Ońtústik Koreıa segiz altyn medal alǵan). Azııa chempıonatynda kúmis pen qola medal bar ekenin de umytyp ketken sııaqty. Ne bolsa da óz úıi, óz jeri. О́z úıińde qabyrǵalar da kómektesedi degen sóz bar ǵoı. Sol sózdiń ras ekenin ózbekter aıqyndap bergendeı.
Endi Azııa chempıonatynda synǵa túsken sańlaqtarymyzdyń jekpe-jekterine toqtalyp, shaǵyn sholý jasap ótsek. Sonymen...
49 kılo – Jomart Erjan. 8-shi oryn
Bokstan ulttyq qurama bapkeri Azııa chempıonatyna baratyn boksshylar tizimin jarııalaǵanda Jomarttan buıyryp jatsa altyn medal, buıyrmasa álem chempıonatyna joldama alsa eken dep tiledik. Biraq, buıyrǵany 8-shi oryn eken. Shırek fınalda álemniń úzdik boksshysy Hasanboı Dýsmatovtan jeńilgenine túsinistikpen qaraýǵa da bolatyn shyǵar. Jaqyn aralyqta álemde Hasanboıdy jeńetin boksshy joq sıqty. Degenmen, kim bilipti. Sport qoı. Bárin kútýge bolady. Al, Jomarttyń joldama úshin ótken básekede ındonezııalyq boksshydan jeńilgen kóńilge qaıaý túsirgeni anyq. Myrzaǵalı Aıtjanovtyń bas aýyrtar salmaǵy osy bop tur. Olımpıadaǵa deıin ýaqyt bar. Tezirek jańa kóshbasshy bola altyn boksshy tabý kerek. Dál qazir ulttyq quramada 49 kıloda Jomarttan bólek, jastar arasyndaǵy álem chempıony Shalqar Aıqynbaı jáne bıylǵy el birinshiliginiń qola júldegeri Ashat Júsipov bar.
52 kılo – Azamat Isaqulov. 3-shi oryn (Qola medal)
Azamat Isaqulov ta elimizdegi tájirıbeli boksshynyń biri. Byltyrǵy el birinshiliginde chempıony atanyp, ulttyq qurama sapynda alǵash ret Azııa chempıonatyna qatysty. Jartylaı fınalda ózbek Latıpovpen teń dárejede judyryqtasqanymen, tóreshiler sheshimi basqasha boldy. Jalpy, Azamattyń bıylǵy birinshiliktegi jetistigi qanaǵattanarlyq. Jartylaı fınaldyq kezdesý fınal bolǵanda da tóreshiler jeńisti ózbekke beretini anyq edi. Bastysy álem chempıonatyna joldama bar. Jibergen qatelikterimen jumys istep, álem chempıonatyna jaqsy daıyndyqpen barsa, Azamat Isaqulov el qorjynyna medal salatyn boksshylardyń biri.
56 kılo: Qaırat Erálıev. 3-shi oryn (Qola medal)
Ulttyq quramadaǵy eń tájirıbeli boksshylardyń biri Qaırat Erálıev Azııa chempıonatyna bıyl qatarynan úshinshi ret qatysyp, ekinshi qola medalyna qol jetkizdi. Elimizde qarsylas shaq keltirmeı júrgen Qaırat Erálıev Olımpıada oıyndaryndaǵy, Azııa jáne Álem chempıonatyndaǵy jekpe-jekteri kóńil qýantarlyq emes. Tóreshiler ádil baǵalamaı jatyr degenniń ózinde de, qarsylastan bir bas joǵary turyp, anyq jáne dál soqqylar jasaı alsa «uıaty» bar tóreshi jeńisti qarsylasqa berýge qymsynatyn shyǵar. Qaıratqa judyryqtasý tásilin ózgertip, soqqysyn kúsheıtý kerek. Jáne de jyldamdyǵyna senim artpaı, qorǵanysta da uqypty bolý kerek. Tájirıbe men minez Erálıevte bar.
60 kılo – Ádilet Qurmetov. 5-shi oryn
Ádilet shırek fınalda mońǵol Otgongalaı Dorjnıambýýmen judyryqtasyp, birinshi raýndta Ádilettiń qabaǵy jarylǵan edi. Medısınalyq kómekten soń tóreshileri jekpe-jekti toqtaýǵa májbúr bop, jeńisti sol ýaqytqa deıin upaı sany boıynsha jeńip kele jatqan mońǵol boksshysyna berdi. Jaraqat kedergi keltirmegende Ádilet Qurmetov fınalǵa deıin jetýge múmkindigi de tájirıbesi de jetip turdy. Biraq, buıyrmaǵan eken. Álem chempıonatyna joldama alǵan Ádilet endi bar múmkindigin Germanııada kórsetedi dep senemiz. Ázirshe, nátıjesi jaman emes.
64 kılo – Bekdáýlet Ibragımov. 3-shi oryn. (Qola medal)
Jartylaı fınalǵa deıin qarsylastaryn óte senimdi túrde jeńip kelgen Bekdáýlet Ibragımov ózbek Ikboljon Holdarovtan aılasyn asyra almady. Bul kezdesýde Bekdáýletke shapshańdyq pen tájirıbe jetispegeni anyq baıqaldy. Jáne taktıka durys qoıylmady. Árıne, qarsylasy da óte yńǵaısyz. Boıy men qolynyń uzyndyǵyn paıdalanyp, alystan judyryqtasty. О́zbek boksshysy durys taktıkasynyń arqasynda jeńiske jetti.
69 kılo – Abylaıhan Júsipov. 2-shi oryn. (Kúmis medal)
Abylaıhan Júsipov elimizdegi daryndy, talatty boksshylardyń biri. Biraq, 69 kılo Júsipovtyń salmaǵy emes sııaqty kórinedi. Bálkim, 64 kıloda júre bergeni durys pa edi. Degenmen, bapkerlerdiń, boksshynyń bir oılaǵany bar ǵoı. Múmkin, Abylaıhan Tokıo olımpıadasyna deıin 69 kılonyń úzdigi bolýǵa osy bastan kirisken shyǵar. Bul jaǵy Júsipovtyń ózine ǵana aıan. Abylaıhanda aqyl, oı, tehnıka bári bar. Tek, kúsh joq. Aldaǵy ýaqytta bapkerleri Abylaıhan Júsipovtyń kúshimen jumys isteıtin shyǵar. 69 kıloda Abylaıdan bólek, jastar arasyndaǵy Álem chempıony Sadrıddın Ahmedov jáne Ilıa Ochkın bar.
75 kılo: Ábilhan Amanqul. 3-shi oryn. (Qola medal)
Elimizdegi 75 kılo salmaqtyń jańa kóshbasshysy atanǵan Ábilhan Amanqul Olımpıada chempıony Baqtııar Artaevtyń bapkeri Nurlan Aqúrpekovtiń tól shákirti. Bul boksshydan da kútkenimiz mol edi. Alaıda, talantty boksshymyz jartylaı fınalda rıng ıesi Israıl Madrımovpen judyryqtasyp, taktıkalyq turǵyda jeńilip qaldy. Jekpe-jekten keıin ózi de qateligin moıyndady. «Men jekpe-jekke daıyn bolǵan edim, biraq birneshe qatelik jiberip aldym. Buıyrsa, álem chempıonatynda onymen (Madrımov – red) jolyǵyp, jeńiske jetemin».
81 kılo – Erik Áljanov. 2-shi oryn. (Kúmis medal)
Bul salmaqtyń úzdikteri Ádilbek Nııazymbetov pen Jánibek Álimhanuly jaraqattaryna baılanysty Azııa chempıonatyna qatysa almaǵan aıtqan edik. Bapkerler bul salmaqta 75 kıloda el chempıonatynyń kúmis júldegeri atanǵan Erik Áljanovty aparǵandy jón sanap, tańdaýda qatelespegin Eriktiń ózi de dáleldep shyqty. Áljanov ózine «bóten» salmaqta judyryqtassa da, basqa áriptesterine qaraǵanda óte joǵary nátıje kórsetti. Chempıon atanýyna da múmkindik bar edi, biraq oǵan tóreshiler jol bermedi. Ishki birinshilikte Ádilbek pen Jánibekke taǵy bir laıyqty qarsylas tabylǵanyna qýanyshtymyz.
91 keli – Vasılıı Levıt. 1-shi oryn. (Altyn medal)
Chempıonat bastalardyń aldynda-aq jankúıerler Levıtten altyn kútkeni ras. О́ıtkeni, Levıtke álemde bolmasa, Azııadan qarsylas tabý qıyn. Bul Vasılıı Levıttiń Olımpıadadan keıingi birinshi iri jarysy bolǵandyqtan, áli babyna tolyq kele qoımaǵan. Azdaǵan kemshilikteri de kórinip turdy. Jýrnalısterge bergen suhbatynda Levıt ózi qatelikterin moıyndap, álem chempıonatyna jaqsy daıyndyqpen baratynyn jetkizdi. Jalpy, 91 kelide bapkerlerdiń upaıy túgel.
+91 kılo – Qamshybek Qońqabaev. 2-shi oryn. (Kúmis medal)
Sońǵy eki Olımpıadanyń qola júldegeri Ivan Dychko kásipqoı boksqa aýysqan soń, asa aýyr salmaqta el namysyn kim qorǵaıdy degen suraq boks mamandaryn biraz oılandyrǵany anyq. Árkim ártúrli nusqalaryn usynyp jatqanda, bapkerlerdiń tańdaýy byltyr el chempıonatynda kúmis medal ıelengen Qamshybek Qońqabaevqa tústi. Ázirshe, senimdi aqtap jatyr deýge bolady. Bıyl ózi qatysqan barlyq jarystarda qarsylastaryn jeńip, Ulttyq quramada birinshi nómirli boksshy bolýǵa laıyq ekenin dáleldeýde. Azııa chempıonatynyń fınalynda ózi eki ret utqan ózbek Bahodır Jalolovpen kezdesti. Jekpe-jek teń dárejede ótken soń, tóreshiler jeńisti esh oılanbastan ózbekke berdi. Qamshybek te ózbekten kem judyryqtasqan joq.
Túıin
Bul azııadaǵy sońǵy chempıonat nemese qazaq boksshylarynyń sońǵy jekpe-jekteri emes. Áli alda úlken-úlken chempıonattar men halyqaralyq týrnırler bar. Degenmen, nátıje jankúıerler men bapkerler kútkendeı bolmady. Sary qurlyq dodasy bastalar aldynda bas bapker Myrzaǵalı Aıtjanov úsh altyn medal alamyz dep boljaǵan edi. Sport bolǵan soń birde jeńis, birde jeńilis bolatyny, bir quramanyń joǵarylaıtyn, bir quramanyń tómendeıtini anyq. Ulttyq quramada býyn almasý dáýiri júrip jatqanyn eskersek, boksshylarymyzdan aldaǵy ýaqytta jarqyn jeńister kútemiz.