Qasym-Jomart Toqaevtyń tóraǵalyǵymen ótip jatqan Úkimettiń keńeıtilgen otyrysynda Premer-mınıstr Oljas Bektenov halyq tabysynyń ósýin qamtamasyz etý boıynsha júrgizilip jatqan jumystar týraly baıandady, dep habarlaıdy Egemen.kz.
Azamattardyń tabys deńgeıiniń artýy ekonomıkanyń ósý qarqynyna sáıkes kelmeıtini atap ótildi. Eńbekaqynyń jalpy ishki ónimdegi úlesiniń kórsetkishi shamamen 31 paıyzdy qurap otyr, bul – Ortalyq Azııa úshin joǵary kórsetkish. Biraq bizdiń maqsatymyz – álemdik ortasha kórsetkish – 40 paıyzǵa jáne odan joǵary deńgeıge jetý.
Jergilikti bıýdjetterdiń respýblıkalyq bıýdjetke táýeldiligi 34%-ǵa deıin tómendeıdi
«Jalaqynyń ósý qarqyny bıznes tabysynyń, onyń ishinde óz kúshimen ári memlekettik qoldaý esebinen alynǵan tabys dınamıkasynan artta qalyp otyr. Osyǵan oraı Úkimet halyqtyń tabysyn arttyrý úshin keshendi sharalardy ázirleýde. Onyń aıasynda qarjylyq, salyqtyq jáne basqa da yntalandyrý sharalary kózdelýde. Olar eńbekaqyny kóterýge, laıyqty jalaqy tóleıtin jumys oryndaryn kóbeıtýge, kásibı daǵdylar men biliktilikti damytýǵa, sondaı-aq azamattar úshin qarjylyq júktemeni azaıtýǵa baǵyttalǵan», dedi Oljas Bektenov.
Úkimettiń 2026 jylǵa arnalǵan negizgi basymdyǵy halyqtyń naqty tabysynyń ósýi bolyp sanalady. Buǵan jańa óndirister qurýǵa, kásipkerlik bastamalardy damytýǵa jáne turaqty jumys oryndaryn ashýǵa baǵyttalǵan júıeli sharalar kesheni yqpal etetin bolady.
Sonymen qatar sıfrlandyrý máselelerine nazar aýdaryldy. Memleket basshysy jarııalaǵan sıfrlandyrý jyly aıasynda Qazaqstan halqyna Joldaýynda ekonomıkanyń barlyq salalaryna ozyq tehnologııalar men JI engizý jáne sıfrly memleket qurý mindeti qoıyldy. Alaıda bul baǵytta júzege asyrý jumystary tıisti deńgeıge jetken joq. Ekonomıkanyń naqty sektorynda sıfrlandyrý prosesteri áli de bastapqy satyda tur. Osy kúnge deıin salalyq derekter qorlary tolyq qalyptaspaı otyr.
Osy jáne basqa da máselelerdiń barlyǵy Úkimet ázirlegen «Digital Qazaqstan» strategııasynda óz sheshimin tabýy tıis, ol barlyq sıfrly bastamalardy jalpyulttyq baǵdarlamaǵa biriktiredi.
10 kúnde jeńildetilgen nesıe: Úkimet bıznesti qoldaýdyń jańa tetikterin ázirlep jatyr