13 shilde kúni halyqaralyq dárejedegi sport nusqaýshysy, alpınıst Erbol Orazalın eki serigimen birge 9-15 jas aralyǵyndaǵy bir top jasóspirimderdi ertip Saıram-О́gem ulttyq parki arqyly serýenge shyqqan.
Nusqaýshylar tájirıbeli, adamgershilikteri joǵary jigitter. Balalardyń ata-analary ulandarynyń týǵan el tabıǵatynyń ǵajaıyptarymen tynystap, arqalanyp qaıtýyna qarsy bolmaıdy. Shynyǵyp, shırap qaıtsyn dep oılaıdy.
On kúnnen keıin oralýǵa tıis top sol ketkennen qumǵa sińgen sýdaı joq bolǵan. Sóıtse 14 shilde kúni Saıram sý kempıngi arqyly ózen bastaýynda turǵan Maıdantalǵa ótip, keri burylmaq bolǵan topty О́zbekstan shekarashylary ustap, shekara buzýshylar dep rásimdep, Bostandyq aýdandyq polısııa bólimine ótkizgen.
Shymkentke oralýǵa tıis balalaryn kútken ata-analardyń jan kúızelisin sózben jetkizý qıyn. Taý saıahatymen aınalysatyn, týǵan jer tabıǵatyn nasıhattap júretin belgili jýrnalıst Keńes Ismaıylov bas bolyp, balalarǵa izdeý jarııalaǵan. Áý basta kúdik ózbek shekarashylaryna túskenimen, jekelegen adamdardyń aralasýy arqyly balalardyń Bostandyq polısııa bóliminde qamalyp otyrǵandyǵy belgili bolǵan.
Taýda arnaıy tartylǵan shekara beldigi joq. Myna metr Qazaqstandiki, myna jarty metr О́zbekstandiki deı almaısyń. О́zbek shekarashylarynyń ásireqyraǵylyq tanytýy bul bir emes. Sonaý jyldary eki el shekarasyn belgileý kezinde arnaıy kelgen Parlament depýtattary men altyn pogondy generaldarymyzdyń kózinshe solardy túsirip júrip, ańdaýsyzda ózbek shekarasyna eki-úsh qadam kirip ketken operatorymyzdy olardyń alyp qashqanyn kórip edik.
Qazaqstanda 400 myńǵa jýyq ózbek dıasporasy turady. Bótensiń degen eshkim joq. Jaǵdaılary óte jaqsy. Problemalary sheshilgen Qazaq olarǵa týysqanym dep qaraıdy.
Týysqandyq eki jaqqa birdeı bolýy kerek. Eń bolmasa habarlap aıtpaı ma? Ár nárseniń talabyna saı tártibi de bolady ǵoı. Shekarada ásireáreketter jasaıtyn ózbek saqshylarynyń osyny oılamaıtyny ókinishti.
Baqtııar TAIJAN,
Ońtústik Qazaqstan oblysy.